El muevo mini seria de sesh episodios en Netflix, El Klub, esta kontando la storia verdadera de dos mujeres judias en los anyos 1950s. La istoria esta pasando en Pera, Beyoğlu en su epoka de oro, kuando era normal de sintir la djente avlar Ladino, Grego i Ermenesko en las kayes de Estambol. La estoria se baza sovre la vida dramatika i difisil de Matilda Aseo i su ija Rashel. Matilda es ija de Salomon Aseo ke era un gran ombre de echos ke perdyo todo su poder durante el Varlık Vergisi. Su ija Matilda ke era muy alta i ermoza se enamoro de un empyegado muy briyante de su padre. La seria esta kontando la vida de dos mujeres fuertes, Matilda i Rashel de la Kula, madre i ija, sovrebivir en un paiz ke se esta trokando muy presto.
Esta produksyon es unika i muy importante por el Ladino porke es la primera seria en el mundo ke konta la estoria de los Sefaradim en Estambol en el siglo 20 i ke muchas partes son en Ladino.
El Klub esta amostrando muy bueno la vida de la djente de Estambol de diferentes komunidades ke biven endjuntos komo vizinos, aunke no se mesklan entre eyos muncho. Ken save kuantos korasones se rompiyeron porke no akseptavan kulturalmente de kazarsen entre diferentes komunidades ma komo dize el grande eskritor, Shakespeare, “el korazon kere lo ke kere.”
La seria entera mos esta amostrando Pera, kon toda su rikeza, la vida kultural de la epoka, kon los kabares, gazinos i sinemas. En un mundo ke se estava trokando muy rapido después de la segunda guerra mondial, las politikas de "azerse Turkos" de estos anyos komo todo los lugares de eglendje fueron tomados de las manos de los Gregos i las diskriminasyones ke izyeron a los non-muzulmanos i las kondisyones ke prepararon los pogromos de 6-7 Septiembre. Todo komo me kontava mi grandpapa.
Miri a El Klub kon lágrimas en mis ojos, una estoria de amor kon pasion ke se bivio kon muncha difikulta, i una kultura en Estambol ke se perdió kaji totalmente oy. El Klub está azyendo un echo muy importante de kontar la istoria muestra de Estambol. La buena novela es ke van a amostrar 4 episodios mas en muy serka.
