La Seria de Filmos en el Netflix: El Klub (2)

Silvyo OVADYA Judeo-Espanyol
17 Kasım 2021 Çarşamba

  La semana pasada en mi artikolo ke tenia el titolo “La Seria de filmos en el Netflix” eskrivi syertas kozas sovre la seria de filmos “El Klub”. Despues ke eskrivi mi artikolo komo todos los Netflixkolikes, mi mujer me disho, ven i vamos a ver el kuatren filmo de la seria i despues el sinken. Unas kuantas oras despues el sejen. Es por esto ke no kero segir serias de filmos en el Netflix. Porke todos no eskapan de segir los filmos antes ke se eskape la seria.Tuve el mazal ke la seria era solo sesh filmos i no kuarenta i sesh. Esta noche de alhad oyendo el “Enkontros de Alhad”, pensi ke devemos de realizar un program kon İzzet Bana, Forti Barokas i mizmo Mois Gabay si tyene la kapachetad de pueder avlar en djudezmo.

  La semana pasada empeso kon el reportaje ke izimos kon la gazeta ke aparese kada vyernes “Oksijen”. I este artikolo topo lugar en la gazeta. En el suplemento ande topa lugar artikolos sovre la kultura, avia un segundo artikolo. Este alhad en todos los diarios, en los suplementos de alhad avia artikolos sovre la seria de filmos.

  Komo semos muy entelijentes, syertos miembros de la administrasyon del Muzeo disheron ke devemos de azer un reportaje bivo en el muzeo kon los artistos o kon los direktores del filmo. Demandimos i mos disheron ke no tyenen el derecho de azer reportajes i de dar deklarasyones sin la permision de Netflix. Lunes demanyana va telefonar a la kompanyiya ke realizo el filmo i ke les ayudi en el empesijo topando una sinagoga para realizar syertas shenas del filmo i de prezentarles a İzzet Bana, ke les ayudo buen karar profesyonalmente, para demandar si puedemos realizar un reportaje. I vamos a asperar la repuesta.

  Ken son los ke los ayudaron? Ya se ke en el empesijo lavoraron kon un profesor de istoria muy savido. I le di munchas savedurias sovre muestra komunidad i su pasado. Le di un alay de fotografias del Orfelinato de Ortaköy. En la mizma epoka o despues, muestro amigo Mois Gabay les ayudo en otros kampos. Forti Barokas, komo lo esta eksplikando en el roportaj ke realizaron kon Izzet en la television ARTI+. Forti mos konto komo ayudo a Matilda por las prononsasyones del Djudezmo i mizmo del ebreo ke empleo kuando estava asendyendo las kandelas de Shabat. Es oy ke pude segir el reportaj realizado i ke turo serka de una ora i medya. Kero rengrasyar a todos, İzzet, Forti, Mois i los otros ke ayudaron i ke dyeron ideas a los ke realizaron esta seria de filmos.

  Vemos mizmo ke en el “Avlaremos” eskrivyeron artikolos ande no kritikan negativamente lo ke se realizo.

  Es diya de djugeves o viernes ke telefoni a İzzet Bana para avlar i demandar syertas kozas. I me disho ke estava muy okupado kon toda la djente ke lo estavan bushkando para demandar syertas kozas o para realizar reportajes. Ya savemos ke el kritiko de filmos, Viktor Apalaçi tuvo un reportaj emportante sovre la seria en un kanal de television.

  Oy, alhad, muestro amigo Mois tenia un torno turistiko en Galata i la sinyora Raşel ke tenia el rolo de la ija de Matilda partisipo al torno i vijito el Muzeo Djudio.

  Ay anyos ke la komunidad lavora i realiza syertas aktividades para pueder azer konoser los Djudios de Turkiya al puevlo. No pensimos ke un filmo asemejante puediya azer un efekto tan emportante.

NB : En el artikolo del Amaneser del mez de Novembre ke eskrivi, malorozamente empleyi el titolo de “La Identitad Djudia Engravada en las Piedras”. Ma no era djusto. El titolo devia de ser:  “Las Sinagogas de Turkiya”. Me devo de eskuzar por este yerro.

Siz de yorumunuzu yapın

Tüm Yorumları Görün