6 Aralık 2021 Pazartesi 12:24

UNA EKSPOZISYON EN LA SINAGOGA ZULFARIS

Şeli GAON Judeo-Espanyol 719 görüntüleme
24 Kasım 2021 Çarşamba

            Antes dos dias, vijitimos kon una amiga la ekspozisyon en la sinagoga “ZULFARIS” ke era el muzeo de los djudyos turkos. Debasho la luz de la enformasyon de las ekskavasyones (kavakaduras) arkeolojikas, la prezensya djudiya en las tyerras de la Anatoliya, tyene 2600 anyos de istorya. Esta ekspozisyon esta aunando los profesyonales de la istorya kon los kuryozos.

El nombre de la ekspozisyon: “La Identidad Djudiya Gravada en las Pyedras” tuvo muncho sukseso sovre los puntos de vista ke se save ke algunos djudyos emigraron de la tyerra santa a esta rejyon i a los Balkanes muncho antes de la destruksyon del segundo templo en el 70 D.C. i empesaron a establesersen en las grandes sivdades del Imperyo Romano.

Komo Ankara, Sardis, Aphrodisias, Korykos, Andriake i Pergamon... de los restos arkeolojikos ke se topo en las eksavasyones de estas sivdades vyejas, se esta determinando ke los djudyos bivyeron aki en el IVen siglo antes de kristo.

               PHOCAEA : En el siglo tersero, una mujer ke se yamava Tation, izo konstruir una sinagoga por la komunidad djudiya, i por esta kavza la regalaron kon una korona de oro.

               SMYRNA: En esta rejyon, se topo 4 enskripsyones ke apartyenen a los djudyos de la  perioda romana, tambyen ay i deskuvyertas de la perioda bizantina.

                TEOS: Se topo una enskripsyon echo de un marmol grizo ke apartyene a los djudyos.

               EPHESUS: En el tyempo de la perioda romana aki biviya una grande komunidad djudiya. En las eskaleras de la biblioteka de “Ephesos Celsus” ay una reprezentasyon de la “Menorah”.

                PERGAMON: Las tombas, una sinagoga ke se restoro (La Sinagoga Yabets), una inskripsyon ke apartyene a una fuente en ebreo i en lingua otomana son las trasas ke kedaron de los djudyos de Pergamon.

                MILETUS: En la rejyon antigua, la evidensya la mas emportante de la egzistensya djudiya es: un eskalon de pyedra ke se topo en el edifisyo del teatro, i ke esta eskrito enriva de la pyedra, “Aki es el lugar de los Djudyos”.

                 SARDES: En las ekskavasyones ke se izo se topo, munchas enskripyones sovre la identidad djudiya, los semboles de la “Menora” en las paredes, tombas, i lo mas emportante, una sinagoga…

                  PHILADELPHIA: Se topo tombas ke aviya gravadas  enriva los semboles del lulav, adas, arava i etrog.

                  CALCHEDON: Se topo aki una menora gravada a la tomba de Jacob.

                  GERMA: Toparon aki una tomba ande esta eskrito

“es la tomba de Jacob kon Esther” una enskripsyon muy vyeja.

                  LYMRA: Las ekskavasyones empesaron aki en el anyo 2012. En la sivdad antigua, Lymra se topo una sinagoga kon un mikve.

                  SİDE: En Side tambyen se topo una sinagoga i se ampeso a kavakar en el anyo 2019.

                  PRIENE: Esta Sinagoga se deskuvryo en los anyos 1895-98. La sinagoga se konstruyo aryento de una kaza antigua elenistika. Ya se save ke en el siglo I D.C. en la Asia Minor, biviyan mas de 100.000 djudyos. En esta rejyon se topo solo 2 sinagogas emportantes. Sardes i Priene…

                  Keridos Lektores, esta ekspozisyon fue organizada kon el apoyo del Muzeo Djudyo de Estambol nomado,

“500. YIL VAKFI TÜRK MUSEVİLERİ MÜZESİ”.

Kero remersyar al Presidente Silvyo Ovadya kon toda su ekipa ke dyeron un grande apoyo para meter en medyo este grande proyekto.

Mis felisitasyones a todos los ke lavoraron…

   

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİLİ HABERLER

İLGİNİZİ ÇEKEBİLİR

Şalom TV Şalom Spotify'da GZ

TÜNELİN UCU - İzel Rozental

TÜNELİN UCU - İzel Rozental

MOZOTROS AİLESİ - İrvin Mandel

MOZOTROS AİLESİ - İrvin Mandel