El “Muzeo de Pera” se konstruyo kon el nombre de “Otel Bristol” en el anyo 1893 por el arkitekto Achille Monoussos. Era una fragua neo-klasik ke se renuvelo en el anyo 2005 por la fondasyon Suna ve İnan Kıraç. Se konstruyo de muevo para dar al puevlo servisyos kulturales i artistikos kalifikados i de nivel alto.
“Pera” es un muzeo moderno i muy ekipado.
Este muzeo muy spesyal, kontyene tres koleksyones grandes:
Antes una semana me fui kon una amiga vijitar el muzeo de Pera, ande aviya una ekspozisyon enteresante: “De Estambol a Bizans”.
En los siglos 19 – 20, el entereso jeopolitiko, akademiko, diplomatiko i komersyal en Estambol, yevo al deskuvrimyento de una erensya rika.
La ekspozisyon “de Estambol a Bizans 1800 – 1955”, en el desvelopamyento de los estudyos bizantinos, esta djugando un grande rolo sovre la kapitala otomana, en una ambians multikultural de Estambol. Una pasyon komun aparesyo en los sirkulos entelektuales de personas de diferentes orijines i paizes ke se unieron.
Para evaluar las muevas ekskavasyones arkeolojikas se ampeso a analizar kon un aserkamyento mas rasyonel,
kon la transformasyon vizual endjuntos kon los esforsos, por modernizar la sivdad.
Akeyos ke se esforsaron para la dokumantasyon del pasado bizantino de Estambol, no solo ke prezervaron el patrimonyo kultural de la sivdad, tambyen developaron metodes de envestigasyones siantifikos.
En el sentro de la ekspozisyon, estamos vyendo las primeras etapas de la eksplorasyon moderna del bizantino.
Es por la primera vez ke la transformasyon de este patrimonyo, de esta erensya, se esta prezentando en su forma de envestigasyon akademika.
Este muzeo komparte las valores ke reprezenta kon el publiko, kon las ekspozisyones, produktos editoryales, aktividades orales, aktividades edukativas, i estudyos siantifikos, i tyene komo objektivo de transmeter esto todo a las jenerasyones futuras.
Despues de esta vijita muy satisfezente, mos fuimos a la patiseriya de Pera ke es al lado del muzeo, para bever un kafe kon mi amiga.
Estuvimos kontentes de este dia kultural ke pasimos, i tomimos una desizyon de vijitar una vez al mez una ekspozisyon.
