Es emportante de aklarar lo ke savemos, i lo ke no savemos sovre lo ke aze la vaksina Covid 19. Lo ke savemos es ke la vaksina es efikas para prevenir los semptomes de la hazinura i ke las personas no se hazineyen tan grave de tener menester de ir al opital. Ma, esto no kere dizir ke no vamos a tener menester de maskas. Esto es lo ke los estudyos dayinda no estan amostrando. Dayinda no se analizo si la vaksina evita de ser portador de Covid-19 i evita de transmeterlo a otras personas. Es posivle ke una persona pueda resivir la vaksina ma seyga portadora sin amostrar los semptomes de la hazinura. El virus puede egzistir en el kondukto nazal, de modo ke si avlamos, respiramos, sarnudamos, puedemos transmeterlo a otras personas. Esto es la razon prensipal ke no puedemos deshar las maskas despues de resivir la vaksina. La vaksina mos va protejar de la hazinura ma es posivle ke tengamos el virus enriva, i pudemos kontajiyar otras personas. Por esta razon vamos a kontinuar a empleyar la maska i a tener la distansya sosyal.
Kuando los setenta por syen del puevlo resiven la vaksina, vamos a tener la imunidad kolektiva. Esto es el punto sufiziante por la proteksyon imunolojika para ke el virus no se propaje mas. Puede pasar munchos mezes fin ke setenta por syen de la djente seygan vaksinados.
Alkansar la imunidad kolektiva va depender de la produksyon, la distribusyon, i la voluntad del puevlo de resivir la vaksina. Muncha djente se estan espantando de vaksinarsen porke no tyenen konfiyensa en las vaksinas. Vamos a tener menester de una kampanya de edukasyon publika para konvenser las personas ke no ay dingun espanto. Por esto, vamos a tener menester la ayuda de todos para ke kuando vyene el torno, todos ke seygan vaksinados. Todos vamos a ayudar a propajar la emportansa de la vaksina para salvar vidas i eskapar esta pandemiya.
Va aver tambyen personas ke no pueden vaksinarsen. Syertas personas pueden tener algunas hazinuras ke es enterdido por eyos de vaksinarsen, o por syertas personas la vaksina no puede ser tan efektiva. Las kreaturas tambyen no pueden vaksinarsen porke la vaksina no es provada por kreaturas. Por esto, kale ke munchas personas seygan vaksinadas para pueder alkansar la imunidad kolektiva. Las personas deven de ser vaksinadas no solo para protejarse a si, ma para protejar a todos. Esto se yama imunidad komunitarya, ke kere dizir protejar la komunidad.
Tambyen devemos kontinuar a empleyar las maskas i tener la distansya sosyal, porke dinguna vaksina no es syen por syen efektiva. La vaksina te proteja si el virus vino a tu nariz o a tu boka. Tu puerpo detekta el virus i en lugar ke el virus atake tu puerpo, el sistema imunolojiko de tu puerpo se aktiva i lo echa afuera. Es muy emportante de evitar ke el virus entre a tu puerpo. La maskara i la distansya sosyal azen esto. En protejando la nariz i la boka, evitan ke el virus entre a tu puerpo.
No va ser muy fasil de salvarmos de esta epidemiya. Mezmo kon la vaksina, vamos a kontinuar a tomar las prekosyones por muncho tyempo.
