Era diya de shabat ke un jurnalisto eskrivio en su artikolo ke kada empesijo de muevo anyo es la mizma koza; dezeamos syertas kozas, desidamos de azer syertas kozas; ma en jeneral estos dezeos son realizados en unos kuantos diyas o unas kuantas semanas. Si mos engodrimos estando en kaza komo este anyo, si dimos karar de aflakarmos de vente o trenta kilos en el empesijo, estamos muy seryozos kon la mueva dieta. Sin tomar alkol i komyendo muy poko i kozas de salud. Es el yampish del empesijo. I despues empesamos a komer i a bever; i de vez en kuando mas muncho ke antes. Ay puedeser syertas personas ke reushen ma el porsentaje no es muy alto. De vez en kuando damos karar de empesar a azer spor en kaminando o en koryendo. I vesh en Machka o en Bebek personas ke empesan a kaminar o a koryer los primeros diyas del anyo. I kinze diyas despues se enfasyan i empesan a ir mas presto a sus echos. Los ke fuman me pueden entender (ay mas de vente anyos ke no esto mas fumando) saven ke lo ke azen no es bueno para sus salud ma kontinuan a fumar. I en el empesijo del anyo dan karar de fumar solo tres o kuatro deyos al diya. Empesan kon tres o kuatro ma despues de unas kuantas semanas fuman mas muncho ke antes. I este jurnalisto disho ke no tyene dingun dezeo en esta epoka, porke los dezeos no se realizan.
No se si es la mizma koza por las kompanyias komersiales. Porke todas estas deven de azer un program para el anyo venidero. Las firmas ande lavoran syenes de personas no pueden no azer un plano para lo ke deven de azer un anyo entero. Deven de realisar muevas kozas para pueder ganar mas muncho de lo ke se deve.
Es la mizma koza para las asosyasyones i las fondasyones ke son dirijadas lo mas por los non profesyoneles. Deke estan azyendo un program sovre lo ke deven de azer un anyo entero? Porke reelmente no es muy fasil de pueder dirijar asosyasyones o fondasyones asemejantes. En un anyo deven de realizar kozas eksepsyonales para reushir en sus kampos.
Vos va dizir syertas kozas sovre muestra asosyasyon: El Sentro Sefaradi d’Estanbol ke lavora sovre la Kultura Sefaradi. Es djusto ke tenemos una kolektivitad de sinkuenta o sesenta personas. Ma para ke krean i para ke lavoren en syertos kampos, devemos de enkorajarlos. Devemos de organizar syertas aktividades o devemos de publikar syertos livros para ke puedan eksposar lo ke estan realizando. El Diya Internasyonal del Ladino es una okazyon emportante sovre este sujeto. Es djusto ke en muestro payis es muy fasil de publikar livros. Ma reelmente no es muy fasil de pueder vender estos livros. Estamos muy kontentes kon el sitio de internet ke realizimos. En el sitio www.istanbulsephardiccenter.com tenemos la posibilidad de vender los livros ke fueron publikados los anyos dalkavo. I esto mos da fuersa para publikar muevos livros i muevos CD’s. Este anyo vash a ver un sitio de internet mas riko en el Sentro Sefaradi. I partikolarmente Karen Şarhon esta lavorando para realizar un proyekto kon un grupo de Turkos ke biven en Espanya para dijitalizar i azer traduksyones en el sitio de internet. Bivir i ver.
