La sezon de otonyo la pasimos sin luvias. I agora ke ya entrimos a la sezon de invyerno, desparte ke dainda no tenemos luvias ya mos eskarinyimos de la inyeve. No se eskapa de eskarinyar solo. Las tenemos de menester para sovrebivir. En las gazetas i la televizyon no ay diya ke no amostren lagos sekos, barajes kon aguas mankas i tierras chatladeadas. Dizen ke espesialmente en Estambol mos kedo agua solo para dos mezes. Mos estan enkomendando de azer atansyon a no empleyar aguas en vaziyo porke el perikolo esta muy seriozo.
En los haberes dalkavo dizen ke la semana ke viene vamos a tener luvias. No savemos si estas luvias van a estar sufizentes, ma abasta ke aga luvia. Toda la agua de las luvias malorozamente no se van a los lagos ni a los barajes. Agora ke vemos ke el klima se troko, kale azer un modo de kaminos para aprovecharmos mas muncho de las luvias. Asigun los sientifikos, tenemos un pujamiento de kalor en la zona klimatika muestra. I por esto no tenemos inyeves. Yo veyo ke del mundo entero se troko el klima.
Avlando por luvias, aviya visto en el internet ke en ivrit las luvias tienen diferentes nombres.
Yore= Las primeras luvias.
Malkosh=Las luvias ke kayen despues de los diyas de luvias. Matar=Luvia fuerte.
Zarzif=damlas damlas.
Revivim=damlas de luvyas ke kayen korajozamente. Zairot=damlas de luvyas ke kayen komo kaveyos.
Sagrir= Luvyas ke kayen i barren.
Delef=Damlas de luvyas ke kayen avagariko.
Los mezes dalkavo vemos luvias ke azen danyos. En estas luvias ke vienen komo seles peryemos no solo los bienes ma tanbien personas. Azen danyo i a lo sembrado, a los arvoles i a las seras de fruta o legumbres. En la fiesta de Sukot arogamos al Sinyor Del Mundo ke mos de luvias kon karar. Ni poko ni muncho. Luvias bendichas i luvias dezeyadas. Luvyas ke artan los kampos i son benefisyozas a la agrikultura.
Me akodro ke anyos antes yene teniyamos mankura de agua. Mos davan agua kon oras. Inchiyamos kuvos, legenes, banyos, kalderas, lo ke topavamos. Mos lavavamos presto presto. Despues ampesimos a meter depos de agua i motores a los apartamentos. La munisipalitad mos trusho agua de las montanyas de la Trakya i echaron bombas de luvyas a las nuves para ke deshen sus kargos de aguas a los barajes.
Mas antes i agora dainda se topan pozos i sisternas en las kazas de las kampanyas. En las sisternas se arekojiyan las luvyas kon los buris ke se topavan en los tejados. Despues kon tulumbas se travava estas aguas de las sisternas para lavados i limpyezas. Aguas para bever se merkava de los sakas. Los sakas teniyan 4 tenekes de aguas ensima sus aznos. Viniyan i vazyavan estas aguas a las tinajas muestras. En las kazas ke aviyan pozos, la agua se travava kon kuvos atados a las kuedras.
Esto ke vos konti agora se izo nostaljiya, espero ke no van a entrar demuevo a muestras vidas.
