Myerkoles pasado en los Estados Unidos, el Presidente Trump salyo loko i disho a un alay de serseris de irsen al Edifisyo del Kongreso para ke no acheten la viktorya del muevo Presidente, Joe Biden. Komo tuvo este koraje? Estamos muy kontentes de ver por la demokrasia ke los djuzgos, mizmo syertos eskojidos por el Presidente Trump, las personas del Kongreso Demokrates i mizmo Republikanos i el mas importante, el viseprezidente, Mike Pence, djuzgaron i dyeron karar kontra Trump. Ya vemos este modo de prezidentes o primer ministros en syertos payizes ke no son reelmente desvelopados o en syertos payises ke tyenen una otorita fashista ke governa el payis. No puedemos pensar esto modo de komportamyento en el 21en siglo por los Estados Unidos. Trump fue un presidente ke ayudo buen karar a Israel. El fue korajozo para transferar la embashada de Tel Aviv a Yerushalayim. Ya savemos ke esta dechizyon fue dada anyos antes en el Kongreso Amerikano ma dingunos no tuvyeron el koraje de aplikarla. Kada sesh mezes avansaron otros sesh mezes el akto de transferar. No es solo esto! Trump avlo dos palavras i se eskapo el problem del Golan ke turo mas de sinkuenta anyos. I todo el mundo save ke oy en diya el Golan apartyene a los Israelyanos. Esto todo es muy emportante para un payis ke tyene una superfisia bastante chika. I es entornado por syertos payizes ke no tyenen buenas relasyones kon Israel. Trump no es solo kon Israel; mizmo kon muestro payiz, la Turkiya tuvo munchas relasyones. Avlo por telefon munchas vezes kon muestro prezidente Erdogan. I se renkontraron munchas vezes … Es djusto ke despues de estas diskusyones no reusheron kada vez a pratikar lo ke avlaron, ma tuvyeron un dialogo. Vamos a ver kualo va ser las relasyones entre la Turkiya i los Estados Unidos kon la prezidensiya de Biden.
Mi opinion es ke un ombre normal komo Biden deve de ser Prezidente, mizmo si no es tan mansevo; ma no keremos mas ke un loko ke tope lugar al poder de un estado tan emportante komo los Estados Unidos. Clinton era mansevo, ma pensava a la pas, la prosperidad para los Amerikanos i para el mundo entero. Es djusto ke kada Amerikano puede merkar una arma para protejarse o mizmo para matar. Ma mizmo kon estas leyes no puediyamos pensar ke un Prezidente iva provokar una populasyon de serseris (ay mismo siertos/as ke vinyeron a Washington kon sus aviones privados, i despues empesaron a romper los vidros del Kongreso) para ke se vayan a terorizar i atakar el Kongreso. Aya deve de ser un lugar sakro para la Demokrasiya. Mi opinion es ke la Demokrasiya Amerikana es bastante poderoza i mizmo Trump se espanto de lo ke izo i empeso a akuzar la djente ke pizaron el Kongreso.
Mi dezeo no es solo por los Estados Unidos; es para todos los payises en el mundo ke no tengan un prezidente ke los puede echar en perikolo.
