Baba Sali

EDEN iSRAEL

El diya 4 del mez Shevat es el Hilula del Rav Israel Abuhatzeira. En okasion de su hilula, me plaze kompartir kon vozotros este artikolo sovre el gran Rav i Kabalista Maroki-Israeli Baba Sali.

בבא סאלי זצ״ל 

El Rav Israel Abuhatzeira desiende de una ilustre famiya Sefaradi. Baba Sali nasio en 1890 (5650), en Rosh HaShana, en Rissani, Maroko. En una parte de su kaza avia una Yeshiva. En otra parte avia el Beit Din de su padre, Rav Masud Abuhatzeira. Una de las prinsipales ensenyansas ke Rav Israel resivio de sus padres es ke “uno deve mantener su lengua i usar su poder de avlar solo para el servisio de Ashem.” Su padre, Rav Masud, le disho: “Ijo mio, solo deves bendizir i avlar bien de los demas, i nunka maldizir.” Esto se torno en una regla en la vida de Rav Israel. El syempre teniya muncha atension a kada una de sus palavras.

Rav Masud no solo eduko a sus ijos sovre la importansya de las palavras, sino tambyen a tener atension a lo ke miran. Las raras vezes ke Rav Masud salia, se kuvria los ojos kon su kapa. 

Rav Israel Abuhatzeira fue muy dilijente en sus estudios de Tora. Sus antepasados fueron grandes estudiozos de Tora. El Rav Shmuel Abuhatzeira, era konosido por su piedad i su erudision. El Rav Shmuel nasio en Eretz Israel i bivio en Damasko ande estudio kon el Rav Haim Vital. El ijo de Rav Shmuel, Yaakov Abuhatzeira, konosido kon el nombre de “Avir Yaakov”, fue un gran erudito i un ombre konosido por realisar grandes maraviyas. El ijo grande de Avir  Yaakov, Rav Masud, el Padre de Baba Sali, era el Av Beit Din de Tafilalet, Maroko. 

En 5682 (1922), Rav Israel va a Eretz Israel a publikar los livros de su ermano asesinado, Rav David Abuhatzeira i para estudiar kon los savyos de Yerushalayim. Kuando el torna al Maroko, el aksepta el titolo de rabino de la sivdad de Bodniv. 

Anyos despues, en 5710 (1950), Baba Sali deside tornar a Israel para bivir en definitivo ayi. El bivio en Yerushalayim i se dediko eksklusivamente al estudio de Tora. Poko despues, el resivio una propozisyon para instalarse en la sivdad de Netivot al Sur de Israel ande la mayoria de sus abitantes eran de orijin Maroki. En muy poko tyempo esta sivdad se izo famoza i miles de personas bushkavan resivir la bendision de Baba Sali. 

Rav Israel Abuhatzeira resivio el nombre de Baba Sali ke sinyifika “Reza al Padre” devido a su abilidad para azer milagros kon sus orasiones. Baba Sali tuvo un gran impakto en la vida de las personas. Muncha djente troko kompletamente su forma de vida devido a su influensia i empesaron a observar la Tora. 

Baba Sali se kazo i tuvo munchos ijos i ijas. El mantuvo relasiones kon todos los grandes rabinos de Israel. El murio el 4 Shevat de 5744 (1984). Miles de personas de todo el mundo asistieron a su funeral. El fue enterrado en Netivot i muncha djente vijita su tumba.

Ke su rekuerdo sea una bendision para el puevlo de Israel.