Hayim Behmoaras
Padre i ijo estavan avlando. El padre le estava dando konsejos de la vida, i le demando, "tyenes amigos entimos?". El ijo, "si ya tengo" le disho. Lo tomo de la mano i salyeron a la guerta. En la guerta teniyan un kimurluk chiko, i la puerta era de tavla. I le disho al ijo, "si le rompes el korason de un amigo, ven aki i en esta puerta, enklava un klavo veremos lo ke va ser". El chiko no entendyo kualo keriya dizir el padre, ma disho dakordo. Despues de una semana, vinyeron en frente de la puerta, aviya dodje klavos en la puerta.
"Agora", le disho el padre, "te vas a ir i los vas a abrasar a los amigos ke les rompites las almas, i te vas a ekskuzar, los vas a ganar de muevo. I dospues vas a vinir de muevo a la puerta, i por kada amigo ke te izites pas vas a kitar un klavo."
Paso otra semana gene vinyeron delantre de la puerta. Esta vez el padre miro ke no ay dingun klavo. I le disho al ijo, "Bravo a ti, esto vyendo ke ya te izites pas kon los amigos.
Dizeme agora kualo estas vyendo en la puerta". El ijo miro i le disho al padre "nada". "Mira otruna vez, mira bueno i dizeme", le disho el padre. Miro, miro, "al lugar de los klavos ay solo burakos."
"Aferum pasha, agora estas vyendo lo djusto, kuando kitas los klavos, sale en medyo los burakos."
Kuando vamoz a avlar kale ke pensemos muy bueno, porke las palavras kuando salen de las bokas, mas no vyenen atras. I kuando se rompe el korason, es muy difisil de enderecharlo...
