Kualo es un nombre? Kualo sinyifika un nombre? El nombre es emportante? Si, es muy emportante, spesyalmente kuando se avla del nombre ebreo / djudio de una persona. En este artikulo va empleyar el termino "nombre ebreo", aunke algunos nombres tradisyonales son en realidad en arameo o Yiddish o Sefaradi o afilu syertos nombres trokados “a la franka”! Aki kero dizir ke mi nombre en el “nufus” era Moshe ma despues de syertos kavzos tuve de trokarlo a un nombre turko. Ma malgrado este trokamyento, en la famiya, oy en diya, mi nombre kedo Moshe i afilu los ijos de mis primos, ke son a lo manko 10 – 15 anyos mas mansevos de mi me yaman “Moshiko”. (Lo ke me aze sintir manseviko!).
Tornando a muestro sujeto, en munchas famiyas, se da un nombre para onorar o para komemorar a un paryente. Los Sefaradis, uzan dar un nombre a los chikos de un paryente ke bive, i en jeneral se da el nombre de los avuelos. En los Ashkenazim, en jeneral, al kontraryo se da el nombre de un paryente ke muryo.
Munchos nombres son de orijin bíbliko i tyenen una sinyifikasyon profundo. Por egzemplo, una ijika puede yamarse Sara en onor a su avuela, ma Sara tambyen es el nombre de una de las matriarkas i sinyifika "prensesa" en ebreo i persyano.
Mas aya de la koneksyon ke un nombre puede ser transmitido en la famiya de uno, es un arrekodramyento para kada djudio de ke el o eya es un aro vital en la fila de la kontinuidad djudia, kon una istorya ke remonta a miles de anyos.
Muestros savyos mos ambezan ke el puevlo djudio fue liberado de la esklavitud ejipsyano porke observaron o mantenyeron sus identidad djudia diferente de los puevlos lokales de tres maneras: vistimyenta, lingua i nombres. Malgrado al fakto ke el puevlo djudio estava emprenyado del paganizmo ejipsyano i enserklados de la adorasyon de ídolos, mantenyendo sus vistimyentas, lingua i nombres tradisyonales les ayudo a mantener sus identidades uniko komo puevlo.
Un nombre ebreo se uza por egzempyo, para yamar a una persona a la teva, para meldar la Tora i para arogar por la salud de uno de la famiya o konosimyento ke esta hazino. Este nombre tambyen se empleya en dokumentos legales djudios komo la Ketuba i para invokar la memorya de una persona despues de ke partyo de este mundo.
Dunke, es importante de uzar el nombre ebreo de una persona, afilu solo kuando se selebran eventos ritualistikos o relijyozos djudios o en la eskola djudia, para ke la identidad asosyada a este nombre no seya peryida.
