IKAGAI, es una filozofia ke nasio en la kultura japoneza, entre los anyos 794-1185. La taktika es muy simple: “ identifikarse kon lo ke es bueno”. Una saviduria popular, una nesesidad para alkansar la felisidad i la satisfaksion personal. El primo objektivo de este konsepto Japonezo es amijorarse en el echo i en la vida de kada dia. Es solamente bushkar “una razon de bivir”, una razon para alevantar de la kama kon entusiazmo. Es un sentimiento ke viene de ariento del umano, lugar donde sus ambisiones, dezeos i satisfaksiones se enkontran. El sentro del ekilibro. La persona ke bushka su “ikigai” es, la ke enkontra la alegria en biviendo. Para yegar a este ideal, devemos de azer un plano i aplikarlo. Devemos de oyermos para saver kualo mos aze bien en la vida i tener en el tino, ke nunka no es tadre para tener un lugar en el mundo.
En el Japon, pensan ke kada individuo tiene su propio “Ikigai”. Para enkontrar muestro “ikigai” klaro i definitivo, devemos de azer una eksplorasion en lo mas profundo de muestra personalidad. Este egzersizio deve de ser personal para pueder konoser lo ke semos, lo ke keremos i pueder realizarlo.
Se save ke las personas de este pais, el Japon, biven mas largo ke las de otros paizes, spesialmente los ke biven en la isla de Okinawa. La longevidad de sus abitantes la izo famoza. Komo en el mundo ke bivimos la kalidad de vida es muy importante, se kreo una kuriozidad para konoser sus maneras de bivir. Las investigasiones mostran ke eyos tienen unas kondisiones fundamentales:
-1.) Bushkar la razon de ser
Bushkar el “ikigai” es un lavoro ke puede durar toda la vida. Para alkansarlo devemos de ser aviertos a todas las sirkonstansias enteresantes. Este estado mental traye una motivasion para estar prontos en frente de las okaziones ke se prezentan i apanyar a las ke mos konvienen. Asi puedemos topar lo ke keremos para ameliorar muestra vida, darle una sinyifikasion i bivir kon gusto.
-2.) Alimentasion
Komer komo se deve es el prinsipal sekreto de una vida sana i larga. Komer bueno es igual a la kura. En Okinawa, las personas se alimentan en bashas kalorias. Konsumen arroz, tofu, peshkado, poko karne, granos, frutas i verduras bien duras ke no piedreron sus vitaminas. No konsumen asukar ni leche. Para eyos, komer avagar i kon plazer da un sentimiento de sanedad i de alegria.
-3.) Aktividad
El movimiento es siempre prezente en la vida de estos abitantes de Okinawa. Para eyos no egziste el konsepto de “retirado”. Las personas deven de lavorar todo el tiempo ke la salud les permete. Asi se sienten motivados i utiles. La yave de la “manseves eternal”, de la salud fizika, mental i emosional esta guardada en la aktividad de kada dia.
-4.) “Moiai”
Es un biervo japonezo ke kere dizir “komunes”. Los habitantes de la isla, forman kon los vizinos ke mantienen los mizmos intereses, unas komunes para ayudar i kultivar la amistad. Esta ambiensia les da un sentimiento de seguridad i amingua la anksiedad del futuro. Una motivasyon de mas para ser orozo.
“IKIGAI” es kompozado de doz palavras: “IKI” ke referensia a la vida i “GAI” ke es una referensia al buto, al dezeo. En realidad no es algo grandiozo, ni ekstraordinario, ma es simplemente una filozofia praktika.
Oguro ke todos en este mundo puedan enkontrar sus “IKIGAI”, sus buto en la vida, i puedan alevantarsen de la kama kon entuziasmo i gusto para empesar el dia.
