En primero vos oguro una aynada buena kon sanedad kon atzlaha i kon alegriya. En avlando kon una amiga salyo kestyon de las eskritas ke eskrivo. Estava bushkando sujeto, me disho, tu ya topas. Vos djuro ke los sujetos me vyenen al pye.
Este anyo, komo todo, troko i las noches del anyo muevo. De ke muryo mi marido yo uzo de pasar el “janvier” kon el ijo chiko porke el grande syempre esta en las turnes. Ama este anyo metyeron la ley de no salir a la kaye, me disheron, madre no kedes sola, ven ande mozos. Pensi esta vakansa esta muy larga, seya ande el grande, seya ande el chiko, kuatro, sinko diyas esta muncho. La savor del musafir es kon la ida. De sorte desidi de pasarlo en mi kazika, ke no me manke. Antes un diya mos topimos i mos dimos los regalos, eyos ke tengan byen i mozos tanbyen. Orozamente tengo unas amigas mas de ermanas. Mi kerida amiga Lüsi Barokas ke mora dos kalejas detras de mi kaza, me envito a su kaza para ke no kede sola. Me disho ke el marido komo lavora, tyene permiso de salir a la kaye la ora ke kere. Muy ermozo ma yo no tengo permiso. Una solusyon ay de tomar permisyon de un numero 199. Eya bushko mil lugares, peno i lazdro no uvo ken le de repuesta. Dishe bushkare i yo, a lo manko paso dos oras kon dos personas. Apenas sono avyo uno kon boz profunda:
---Alo, komo te puedo ayudar ambulans? Doktor? Kualo keres??
--- No, no kero nada; kero permisyon para irme ande mi ermano ke mora dos kalejas mas aya. Kualo puedo azer?
I empesoaron las demandas:
--- Komo te yamas? Kuantos anyos tyenes? Ande moras? Deke keres salir? Ande te vas a ir?
Le di repuesta a todo.
--- Es defendido de salir a la kaye; ay "pırasadur".
--- Ya lo se sinyor, es por esto ke vos bushki.
--- No saves ke es defendido azer partis? Para partis no ay "pırasadur".
--- Si, ya lo se, no es parti, es ke vamos a pasar dos tres oras endjuntos.
Ya entendi ke kere dizir prosedur, neyse yo le digo ke azesh Hayimachi, el me dize en Kulaksız moro. A la fin le dishe:
--- Kurto me puedes mandar al mobil un mesaje ke ya puedo salir fin las dodje a la kaye?
--- Yo te puedo mandar un papel fin tu kaza si te keres ir a viajar, si te keres ir a Erzurum, a Elazığ, a Ankara… Keres?
Le oguri aynada buena!
Kon esta korona me ambezi munchas kozas. Me ambezi asentar en kaza diyas i mezes, me ambezi a no ver a los ijos i inyetos, me ambezi a no bezar i abrasar a un kerido i me ambezi kedando tres oras para entrar al anyo 2021 ke me puedo ir de Ortaköy a Elazığ i no me puedo ir de Ortaköy a Ortaköy!
