La semana pasada se komemoro el Dia Internasyonal de la “Komemorasyon de las Viktimas del Olokosto”, en Turkiya i kaji en el mundo entero, todos los paises azyendolo a sus maneras. En la Turkiya se inoguro un sityo de internet dedikado al Olokosto i otros jenosides (www.weremember.gov.tr)
Kuando se avla del Olokosto la primera palavra o nombre ke mos vyene al tino es Auschwitz. Fue, i es, el mas infamo de los kampos de muerte i de konsantrasyon establesidos por los Nazis. Devo de akodrarvos ke Auschwitz no era kompozado de un solo kampo ma era una aglomerasyon de kampos. Algunas seksyones eran kampos de lavoro forsado, otras partes eran spesifikamente para prizonyeros de gerra (no djudios), i aviya Birkenau (tambyen konosido komo Auschwitz II), ke era el kampo de eksterminasyon en mayoriya de los djudios i de los jitanos. Kaji 1.200.000 personas, ombres, mujeres, chikos, vyejos, hazinos o sanos fueron masakrados en este lugar infamozo.
El 27 de Enero de 1945, un batalyon de la armada sovyetika arivo a las puertas del kampo de eksterminasyon. No les pasava del tino lo ke ivan a ver, no estavan aparejados para las orivles kondisyones, los detenidos ke pudyeron kedar en vida ma kaji komo eskeletos o las orores inimajinavles ke deskuvriyeron. Kuando arivo la armada sovietika, aviya mas poko de 7.000 detenidos en el kampo. Unos kuantos dias antes, los Nazis aviyan tomado del kampo a otros 50.000 detenidos i los embiyaron a otros kampos, a pye i kon kondisyones orivles ke se konosyo komo la infama “marcha de la muerte”. Munchos muryeron en el kamino, o matados por los Nazis o porke estavan muy flakos para suportar este kamino i de mas kon un tyempo de invyerno.
La liberasyon de Auschwitz fue un evento muy importante, tan ke la salvasyon a lo manko de unos kuantos miles de almas i la deskuvyerta de las orores de los Nazis. En rekonosimyento de este fakto istoriko, el 27 de Enero se deklaro la data ofisyal del Dia Internasyonal de la Komemorasyon de las Viktimas del Olokosto segun la desizyon de las Nasyones Unidas en Novembre de 2005, desizyon adoptada segun la Rezolusyon 60/7 de la Asamblea Jeneral. La rezolusyon, ke fue inisyada por el Estado de Israel, fue adoptada despues del 60en aniversaryo de la liberasyon de Auschwitz, komo un rekonosimyento de ke en unas dos dekadas mas o menos despues, la komunidad de sovrebivyentes ke bivyeron estas orores ya no van a poder partajar sus eksperiensas. La rezolusyon 60/7 onora la memorya de las víktimas del Olokosto, (no solo djudios, ma todos las viktimas enkluyendo los 11 milyones ke fueron masakrados achakes de apartener a grupos etnikos ke no eran aryanes, modo de vida o otras razones diversas), refuza la negasyon del Olokosto, lavora por la prezervasyon de los sitios istorikos ande se bivyeron las atrosidades i rekomenda i konseja sovre la edukasyon del Olokosto.
Devo de sinyalar ke desde 1953, los djudios observan un Dia de Komemorasyon del Olokosto spesyal, en el 27 de Nisan (data a la djudia), ke se nombra komo Yom Hashoah. A saver ke el 27 de Nisan es tanbyen el dia de Komemorasyon de los kombatantes del Ghetto de Varsovia i el nombre entero de este dia es en Ivrit “Yom Hazikaron laShoah ve laGevurah” (Dia de komemorasyon del Olokosto i del eroizmo).
