Alberto Modiano
Kuando estava estudiando en la eskola segundaria, kada enverano, kon mi famiya, mos ivamos a Büyükada, ke los gregos yamavan Prinkipo. Teniamos una kaza ke mos aviya kedado de mi granpapa. Yo en akeya edad no teniya munchos amigos i me enfasyava muncho. Las demanyanas, despues ke mi madre eskapava de gizar, tomavamos muestros mayos i mos ivamos a la plaj para nadar, i despues de komer aziamos la siesta. Fina la noche no tenia nada de azer.
En Büyükada teniyamos un tio ke teniya un magazen ande vendiya parfumeria. Mi madre, viendo ke me esto sikilando muncho, me demando si keriya lavorar i ayudarle a mi tiyo. I yo aksepti esta propozisyon. Mi madre avlo kon el tio i el aksepto. I este modo ampesi a lavorar.
D'en diya en diya me ambezi las markas de los rujes, de las manikures, de los spreyes para kaveyos i de los shampuanes. Lo mas emportante eran las kremas para protejarmos del sol. En kurto, lo mas de kozas ke vendiyamos enteresavan a las mujeres. Para los ombres se vendiya shavones para arapar, losyones para uzar despues de arapar, penyes para penyar i unos kuantos parfumes para ke golgan bueno a las mujueres.
El tio kada diya me mostrava los puntos delikados de esta profesyon porke estavamos sirviyendo las mujeres i las mansevas.
Aviya una ombre ke viniya una diya de kada semana. Entrava al magazen, i diziya unas kozas a la oreja de mi tio, despues el tio kitava una koza chikitika de debasho de la meza, la metiya aryento de un sako ke no se vea el de ayrento. Esto se pasava kada semana.
Una ves despues ke este ombre salyo del magazen, demandi al tio:
- Dime tio, tu vendes kozas ke no son legal de vender, ke los estas kitando de debasho de la meza?
I mi tio disho ke:
- Aspera ke salgan los klientes i te va dizir.
Ma los klientes, uno saliya, otro entrava. Mi tio se ulvido de eksplikarme. A la noche, kuando estavamos serrando el magazen, me akodri i le demandi una vez mas. I mi onkl disho ke:
- Tu no saves kualo es kondom?
- Si, le respondi i el kontinuo:
- Si los vendemos en un lugar ke se ven, las mujeres no merkan ni rujes, ni kremas.
