En los diyas los mas oskuros del venten siglo, kuando el Olokosto empeso en la Evropa, el koraje de una mujer salvo la vida de unas kuantas famiyas judiyas de un chiko puevlo ukranyano. Esther Stermer biviya en este puevlo kon sus sesh ijos finke las fuersas nazis vinyeron fin aya. Mas de mil judyos fueron embiyados a los kampos, ande la majoridad muryeron.
Esther topo un kamino. Endjuntos kon su famiya, sus sesh ijos, (dos de eyos syendo Saul i Sam Stermer ke agora tyenen mas de setenta anyos), pasaron un anyo i medyo debasho de la tyerra, bivyendo en la oskuridad total de dos grandes grotas en Ukrania, endjuntos kon otros 36 judyos, para fuyir de la persekusyon de los nazis.
"No estavamos en seguridad’’, disho Sam Stermer, "Ma nunka mos rendimos". Esta istorya ke surprendio a todos, salyo a la luz setenta anyos despues en el dokumental "No Place on Earth". En el mez oktubre del anyo 2010, Saul i Sam vinyeron a vijitar la grota por la primera vez.
Janet Tobias ke dirijo el filmo, disho ke la persona es kapache de azer todo para salvarse de la muerte. Saul i Sam estan agredisidos a sus madre porke les salvo la vida i los mantenyo mas de kinyentos diyas ke pasaron endjuntos en la oskuridad de las grotas. "Teniyamos una madre muy entelijente", disho Sam. "Si no era ansina, agora no ivamos estar en vida.’
Ansina toparon un kamino en las profondidades de las grotas serkanas ke se ekstendiyan por miles de kilometros, bivyendo en la obskuridad total, komo los ratones, solo komyendo i durmyendo. "Te ivas a durmir kon una kuvyerta i un kavesal", disho Saul Stermer. "Mas ke keriyas? Estavas en el paradiso".
Por la famiya Stermer, las grotas eran el lugar de la libertad ke la gerra les aviya rovado. "Estavamos liberos", disho Sam. Una vez, los soldados almanes de SS atakaron la primera grota ande estavan eskondidos. Su madre, Esther, los enfrento. "Eya salyo de la grota, i se metyo enfrente del soldados ke teniyan revolveres en el ombro, i les disho, "Deke vos estash espantando de aki? Es ke el Fuhrer va peryer la gerra porke estamos bivyendo aki? Vos puedesh imajinar ke una mujer judiya diga solo la palavra 'Fuhrer'?" disho Sam.
Las noches saliyan a bushkar de komer, konstruyeron dushes i tualetes debasho la tyerra fin ke finalmente, en el mez avril del anyo 1944, la armada rusa salvo akeya rejyon i las sinko famiyas (38 judyos en total) salyeron a la luz i a la vida afuera de las grotas.
Despues de la gerra, Saul i Sam Stermer se fueron a Kanada, fondaron un negosyo de kontratasyon ande kontinuaron a lavorar kada diya. La terrivle eksperiensya de bivir debasho de la tierra, pasar noches en un espasyo de grota, les izo entender la valor de la vida ke biven. "Estavamos orozos de pueder sovrebivir. Esto es un regalo del Dio" disho Sam.
"I despues, la vida empeso a kontinuar komo normal, i esto es todo. Lavorimos para adelantar. Mirimos a ganar para pueder kedar en vida despues de la gerra".
Oy, estos 38 sovrebiventes tyenen mas de 125 ijos, inyetos i bisinyetos. Tyenen una istorya: komo pudyeron bivir en la oskuridad. "Esta es una istorya kompletamente diferente, porke tyene un final orozo", disho Saul.
