La istorya sorprendemente djudia de Club Med
La djente bushkan i asperan muncho de sus vakansas en estos dias (siguramente en los tyempos normales komo antes de la epidemiya), desde los medyos de aflakarse asta las demandas espirituales komo yoga o meditasyon. Para dos grupos de djudios antroproneres en la era de despues de la gerra (sigunda), las vakansas paresiyan una oportunidad para dar a la djente un medio de salida verso la prosperidad muevamente deskuvyerta i un respiro afin de alesharse del espanto de la gerra, i todo esto mesklado kon un poko de idealizmo sosyalista.
El Borscht Belt (o Alpes djudios, es un nombre ke se dyo para los lugares de vakansas de enverano, en su mayoría dezaparesidos, de las montanyas Catskill serka de las sivdades de Sullivan, Orange i Ulster en el norte del estado de Nueva York, Estados Unidos. Estos sentros turistikos fueron un lugar de vakansas popular para los djudios de la sivdad de Nueva York desde la dekada de 1920 asta la dekada de 1960. La dekada de 1950, por seguro, es famozo por propozar a los djudios amerikanos unas vakansas luksyozos ma en mizmo tyempo en azyendo todo para ke te syentas en tu kaza. En estas vakansas los djudios podiyan repozar i relaksarsen komo sus kompatriotas WASP (White-Anglo-Saxon-Protestant es un byervo ke se uza para definir un amerikano tipiko, blanko, de orijin anglo-sakson i de relijyon protestan). Ma myentres, dos ex-miyembros de la rezistensya franseza kontra el nazismo, Gerard Blitz i Gilbert Trigano, estavan aparejando i montando tentas para el Club Méditerranée o, mas konosido komo Club Med. Blitz, ijo de padre djudio i madre katolika, myembro del ekipo nasyonal de Beljika de waterpolo ke gano munchas medalyas olimpikos, ma refuzo de partisipar a los djugos olímpikos de Berlín de 1936 malgrado ke era un myembro muy emportante de este ekipo. Trigano, ijo de djudios fransezes de Algeria, lavoro en la rezistensya franseza, eskrivyendo i distribuyendo broshures anti-nazis.
En 1950, Blitz fundyo un “kazaliko” de kulibas de paja en una playa de Mallorca i se aserko de Trigano para ke se asosye kon el, 3 anyos despues. Al igual ke en los sentros turistikos populares de Catskills, era inkluzo todas las komidas, el lojamyento i las aktividades solitaryos o de grupos. Ma una diferensya de los oteles grandes de Catskills, Club Med lo mantuvo simple i utopiko, i lo kompleto kon instalasyones de lavar i dushes komunitarias i bondjukes o jetones komo moneda.
Despues de ke Blitz i Trigano travaron la atansyon i los dolares de los Rothschild, los orijines utopikos del Club Med empesaron a pareser a lo ke oy yamamos una eksperiyensa Euro-Disney. Ma, kuando todo lo ke teniyan era tentas de kampanya de gerra, eksedentes de la armada, amostraron ke vakansas podiyan dar a las personas kansados i enfasyados de la gerra, mas ke un simple deskanso del lavoro regular.
Transladado i adaptado del JTA de 25 de Novembre 2014, “The Surprisingly Jewish History of Club Med”.
