Perasha Tetsave

Le almenara (menora) ke se topava en el santuvaryo sembolizava la Tora. Shelomo Ameleh en el livro de Mishle, asemeja la kandela a las enkomendansas, i a la Tora a la luz. I la sensya es una luz. Komo la eksplika el savyo Shelomo Ameleh en el livro Koelet, la sensya de el ombre arelumbra sus fases. La persona ke estudya i kompra la sensya sus ojos briyan. La sensya de la Tora, es klara, arelumbra los ojos, la menora (la almenara) ke se topava en el santuvaryo, dava santedad, i fineza a el puevlo djudyo. I tambien un mantenimyento sin rejisto ni verguensa.

No es fasil de alkansar i komprar la ley i el mantenimyento, deve de azer la persona muncho esforso, a alkansar estas vertudes si la persona dize: “Lazdri muncho i no pude alkansar” no te kreyas, i tambien “no lazdri i alkansi” no te kreyas. Para alkansar a el estudyo de la Tora, i el mantenimyento, deve de azer el ombre muncho esforso. Komo lo meldamos en Pirke Avot, aperejate a ti mismo a el estudyo de la Tora: por ke no es una erensya. La Tora demanda de nozotros lazerya, i esforsos por el mantenimyento de la persona. Dize la Tora, “kon la sudor de tu frente komeras el pan”. En el livro de Iyov, meldamos ke la persona nasyo por penar. Por el estudyo de la Tora deve el ombre penar kon todo su korason i kon toda su alma. Por su mantenimyento deve penar sigun su menester.

Komo meldamos en el livro de Teilim, “kuando komeras kon lazerya de tus manos, bien aventurado tu i bien a ti”. En la vida ay menesteres, de la ley i el lavoro.

Komo meldamos en el Perakim: La ley i el lavoro tira a la persona de el pekado. En la perasha de Behukotay meldamos, “si en mis fueros andaras”. Rashi eksplika este verseto dizyendo: Ke estudyes mi ley. En la Tora meldamos, “sesh dias azeras tu lavoro, i kompletaras todo tu echo. Por alkansar a el diya de Shabat i entremeterte kon santedad a el estudyo de la Tora”.

Santedad a el estudyo de la Tora. En el Talmud dize: No asemeja meldar un teksto 100 vezes o 101 vez. Egziste lazerya sin kanserya, si la persona pena para alkansar a un buto i el buto ke kere alkansar es un buto sakro, no konsyente la persona una kanserya.

Los ke esperan a el Kriyador se inchen de fuersa, korren i no se kansan, andan i no se kansan.

La luz de la Ley syempre ke nos arelumbre. Amen!