Alhad el 21.02.2021, el Sentro Sefaradi de Estambol organizo komo kada anyo, un dia maraviyozo kon konferensyas, kantikas, koros de mujeres i kriyaturas, teatro, komidas i kuentos nostaljikos ke sureyo tres oras malorozamente en el ZOOM, a kavza de este virus maldicho, “CORONA” ke mos kito el guste de bivir ay un anyo. Siguramente ke keriyamos prezentar este program en la shena, ma no uvo remedyo…
En primero “Karen Gershon Şarhon” ke es el braso derecho del presidente “Silvyo Ovadya” del Sentro Sefaradi de Estambol, izo una avla kurta para dizir “Bienvenidos” a todos los ke partisiparon al Zoom, i despues “Silvyo Ovadya” avlo sovre este dia muy presyozo ke estamos selebrando kon muncho esforso i kerensya a esta lingua ke es muestra lingua maternal i la emportansa de no desharla murir.
Despues “Anna Eskenazi” konto la boda de su ijo ke tuvo lugar en la India antes unos kuantos anyos. Una boda muy enteresante kon diferentes tradisyones, las vistimyentas multikolores, veramente una boda unika i muy sinyifikativa.
“Liliana Benveniste” kon su boz ermoza kanto una kantika.
“Suzet Herman” ampeso a avlar de una boda muzulmana ke estuvo envitada. El lavorante de su marido (z.l.) iva kazar al ijo i siguramente ke le rogo de partisipar al patron.
Kon su savrozor, avlo azyendo los djestos, kantando una kantika en turko, i komo se termino esta boda a la fin, una lokura…
Entremientes una kantika del “Koro NES” de las mujeres, intitulada “Arvolikos d’Almendra” ke el shef es el famozo “İzzet Bana”.
“Şeli Gaon”konto una boda ke asistyo en Israel, una boda ekstravagante, sin ke ayga haham i hupa. Lo ke estava enteresante en su avla era el karnaval de vistimyentas muy diferentes, el komporto de la manseves de agora ke no keren kazarsen i tener relasyones kon el rabanut, i komo estan parvinyendo a azer akseptar a sus famiyas todo lo ke keren…
“Seyfi İşman” en la “Savor de Boka” ke konto, izo azer pareser la vida de una persona a un treno, del empesijo del nasimyento fina la muerte, kon una lingua yena de fiksyon i en amostrandomos un treno ke esta viajando entre las vistas maraviyozas del mundo.
“Eliz Gatenyo” mos konto un de su chikez. Una istorya nostaljika, yeno de kerensya i respekto al den frente, kon su avla perfekta en ladino, i kon su postura dulse i kalma.
Ya vinimos al famozo teatro “Los Alkulumbres” eskrito por la grande artista “Forti Barokas” i dirijado por el mansevo maestro “Ferit Koen”. Un teatro maraviyozo sovre el sujeto “Las Tradisyones Djudias” djugado perfektamente i prezantado de una manera ordenada. Las Tradisyones eran: La noche de Shabbat, El Mikve, La Paridura, La Fashadura, El Pidyon ets… Estava tan ermozo ke no keriyamos ke se termine…
“Hayim Behmuaras”, el simpatiko i el sangrudo mos kanto en azyendo una komida, la meza ke metyo i otros detalyos.
“İda Benromano” ke es Edirneliya, mos ambezo komo se gizan las albondigitas kon avramila, una komida muy savroza ke kere atansyon i abilidad para azerla.
“Fani Ender” i “Nelly Barokas” ke biven en İsrael, mos dyeron detalyos sovre la organizasyon de la “İtahdut”, sovre lo ke se okupan. “İtahdut Yotsei mi Turkiya” es una asosyasyon de los djudyos turkos ke izyeron aliya a la tyerra santa.
“Gila Hassid” kon la kantika “Nina” mos emosyono a todos. Kon su boz de seda estava una maraviya. "Kenan Kruz Çilli”, un mansevo muy reushido, izo una konferensya sovre un djudyo presyozo ke tyene la tomba en Antalya, izo munchas envestigasyones. Estava mas ke enteresante.
Juan Sanchez, un ijiko de 13 anyos ke bive en Seattle, mos avlo en Ladino muy ermozo i mos konto komo se intereso en la lingua i komo se la ambezo!
“Las Estreyikas” ke estavan bolando kon las kantikas ekstraordinaryas.
Keridos Lektores, este anyo lo fyestimos en el ZOOM, esperamos fyestarlo en el anyo 2022 en la shena kon el nombre del Dyo.
