Hayim Behmoaras
Antes dyez diyas, teniyamos una fyesta. Fyesta del Diya del Ladino. Este anyo achakes de la corona lo izimos en el zoom, i se izo una koza maraviyoza.
I yo partisipi a este diya kon una kantika. Esta kantika estava kontando la alegriya i la importansya de las mezas, i de las famiyas.
Keridos, yo oy kero avlar un poko de las mezas. Son muy importantes; mos parese ke solo son de tavla i tyenen kuatro pyezes, i solo son para komer, i para djugar kartikas. Ma no es ansina, eyas tyenen sus alma, i tyenen aryento sus konsejikas eskondidas. Yo tengo una meza en el salon puedeser de syen anyos.
A mi me paso ke este en ganeden de mi madre, i a mi madre le paso de su madre, una meza parpahliya. Solo los pyezes ya abasta para kontar todo, pyezes de leon kon las unyas, me parese ke vos akodrash de estas mezas.
Las mezas tyenen una misyon muy importante, mos arekoje kon la famiya, kon los amigos, i kon los keridos. Aki es una arena ande se azen pas los aravyados kon una ermoza komida, i kon ermozas palavras i se abrasan. Es arena de fyestas, arena de tradisyones, las konversasyones ermozas se azen aki, i kuando avres un bokal de raki las kantikas salen de las bokas de suyo.
Es un espejo de amistad, de famiya, i de kaza. En vezes te kontan unas konsejikas, ke te yevan anyos i anyos atras. En esta meza kuantas fyestas i pransos tuvimos me olvidi por mi vida. Kuando era chiko los meldados de anyos, u de sinko u de dyes se aziya en kaza, por onor de los ke estan en Ganeden.
İjikos si teniya boka esta meza, voz kontava, no era noche de meldado, paresia noche de fyesta. Antez de trez diyas enpesavan aparejar las komidas... Aziyan, bulemas, borrekas, tarama, saladrüs este modo se diziya, pishkado alimpyado se eskaldava dospues kon mayonez te chupavas los dedos, yalancı dolma, guevos haminados i raki. Dospues arroz, bezelya i karne . Komo esto tyenen munchas konsejikas guadradas las mezas.
Por esto las mezas son muy importantes, syempre ke seyan para pransos para alegriyas, i kon las siyas yenas. MEZAS DE ALEGRIYAS!
