13 anyos antes kuando era presidente de muestra komunidad dishe a mi amigo Moris Levi ke devemos de realizar un livro kon fotografias i kon eksplikasyones sovre todas las sinagogas de muestro payis: la Turkiya. I Moris kon el ayudo de Gila Erbeş ke es la editoria de los livros ke se publikan en las edisyones del Şalom reusheron a publikar un livro maraviyozo. Todos konosen a İzzet Keribar por sus fotografias i a Naim Avigdor Güleryüz por sus eksplkikasyones istorikos. Mizmo en la primera oja del livro İzzet Keribar me esta rengrasyando porke es a el ke le demandi si keriya realizar un proyekto asemejante. Despues de la publikasyon del livro organizaron una ekspozisyon en Estanbol ande presentaron el livro. Despues avlimos kon syertas personas. Me parese ke Zali Detoledo mos avia ayudado para azer esta ekspozisyon en el Muzeo de la Diaspora en Tel Aviv, Beit Hatfutsot. Una sala muy grande i muy alta i buen illuminada. Me akodro ke pasimos un diya en el Tayelet de Tel Aviv kon el Hahambashi Rav Haleva i kon Gila Erbeş asperando la ora de la avyertura de la ekspozisyon. Era el anyo 2008.
La sola mankura fue ke muestros amigos se espantaron de publikar munchos livros, i la edisyon en turko se eskapo en poko tyempo. Era un buen regalo kuando teniyash un buen musafir o un otorizado emportante. I los dirijentes de muestra Komunidad teniyan la uzansa de prezentar este livro komo regalo.
Kuando fue elijido a la presidensya de la fondasyon del Muzeo Djudio, Avi Habib, ke era prezidente antes de mi perioda me disho kon su kolaborador Dani Dinler ke se deve de publikar este livro de muevo i me aprometieron de ayudarme. I reelmente me estan ayudando. Estamos realizando este proyekto kon İzzet Keribar i Naim Güleryüz ke lavoran komo mansevos de vente anyos. Es reelmente muy difisil de pueder lavorar kon una rapidez asemejante. Ma esto muy orozo porke vamos a realizar el proyekto en poko tyempo. Kale ke avle de la ke realiso el dizenyo del livro. Joel Imamoğlu es una de las mas renomada. No esta azyendo mas este echo; ma mos esta ayudando porke realizo el dizenyo de la primera edision.
Durante estos 13 anyos la komunidad Djudia no kedo repozada; ni la la Direksyon de las Fondasyones. Eyos restoraron la Sinagoga de Edirne, de Gaziantep i de Kilis. En Hasköy, la Sinagoga Esgher no es mas una kavane. La Munisipalidad de Beyoğlu esta restorando el edifisyo para formar una biblioteka. La Sinagoga de Alsancak de İzmir fue konstruida de muevo. Los İzmirlis estan restorando las sinagogas ke se topan en la kaleja de las “Havras” Sinagogas. La Munisipalidad de Bergama restoro la sinagoga del kazal. La Komunidad de Hasköy tyene en mano las sinagogas Sinyora, Abudara i Mayor ande no se topan mas fabrikas o atelyes de echo de fierro. Mizmo pudimos organisar orasyones en los kales Abudara de Hasköy i Istipol de Balat.
Espero ke en poko tyempo vash a pueder topar la segunda edision de este livro maraviyozo.
