El 25 del mez de Marso 1911, uvo un grande fuego en una grande fabrika de New York (The Triangle Factory). Las lavorantes de esta fabrika eran Italyanas i Judiyas ke aviyan emigrado kinze anyos antes a los Etados Unidos para topar una vida mijor. Syen i kuarenta i sesh de las kinyentas lavorantes de la fabrika muryeron de vista en el fuego. Los patrones uzavan echar kavenado a las puertas de salida afin ke las lavorantes no puedan rovar nada. Por modo de esto, no pudyeron avrir las puertas de salida i munchas preferaron echarsen de la ventana abasho, en lugar de kemarsen bivas bivas.
"The Ladies' Garment Workers' Union" (LGWU) ke es un sendikato de lavorantes de produktos de ornamento, organizo un miting kontra las kondisyones perikolozas de lavoro de las mujeres. Investigasyones kontra los patrones kontinuo un sierto tyempo i a la fin las lavorantes pudyeron ovligar los patrones a pagar un syerto montante a las famiyas de kada viktima. Este insidento tuvo una influensya sovre la lejislasyon de lavoro en Los Etados Unidos. Despues de un kombate largo i difisil, el sendikato (LGWU) reusho a obtener mijor kondisyones por las lavorantes.
Ansi, este grande dezastre fue el empesijo de la organizasyon para estableser un diya para las mujeres en el mundo entero. En los anyos 1960, en el segundo movimyento de mujeres, muevas leyes fueron akseptadas: leyes prohibitando la diskriminasyon i la violensya kontra las mujeres; leyes dando igualas posibilidades de edukasyon, de echo, i de konje pagado para las paridas ansi ke diritos por las mujeres kazadas.
Las mujeres judiyas djugaron un grande rolo en movimyentos semejantes. Las aktivistas, las profesyonelas, las artistas, las eskrivanas, las intelektuales judiyas tuvyeron una grande kontribusyon en el movimyento de los anyos 1960. Malorozamente las mujeres judiyas del movimiento enkontraron un otro grande problema: "el antisemitizmo". Ma eyas kontinuaron a lavorar para obtener diferentes derechos i tambyen luchar kontra el antisemitizmo por modo ke el mundo se konsyenta de la dezgrasya de este problema.
Las mujeres judiyas tambyen gerreyaron para azer adelantar las kondisyones de las mujeres en las komunidades judiyas. Rachel Adler es una de eyas. La karga de la mujer judiya es mas pezgada de las otras, porke eya es ovligada a gerreyar kon las limitasyones tradisyonales del judaizmo. El get es uno de estas limitasyones.
En el livro 'Scapegoat' de Andrea Dworkin, puedesh topar estas linyas: 'Las mujeres judiyas fueron 'scapegoats' (kavras de pekados) en todas las epokas de la istorya. En la Inkizisyon, las mujeres fueron akuzadas por ser majisyanas. En el Olokosto, los nazis atakaron el puerpo de las mujeres sin tener dingun respekto a sus eguardo.
En los anyos 1980, en el treser movimyento de mujeres, eyas penaron para "obtener el dirito de tener reprezentantes en la politika i en el governo", "suprimir las limitasyones en sus karyeras" i "ganar el dirito de kurtaj". La judiya feminista Gloria Steimem fue la mas grande protektora de este dirito. Rose Shneiderman, Emma Goldman, Betty Friedar, Hannah Arendt, Gloria Steinem, Rachel Adler, Andrea Dworkin son unas kuantas de estas aktivistas. Oy las mujeres judiyas son akademisyanas, politikas, astronotas i loreatas del premyo Nobel.
El lavoro de las mujeres judiyas en la Diaspora no se eskapo. Sus mas grande gerra es kontra la asimilasyon. La mujer judiya esta gerreyando para prezervar la identitad judiya de sus ijos i de su famiya.
