Munchas vezes meldimos la istorya de Servet i Derviş Korkut, ke paso en Sarajevo en el anyo 1942. Ma Pesah aserkandose kije akodrar estos marido-mujer korajozos i nomados “Just among the Nations” por Yad Vashem.
Derviş i Servet Korkut eran muzulmanes de etnia albaneza ke biviyan en Sarajevo, ke era parte del Estado Independyente de Kroasia (oy se yama Bosnia). Servet pasava su tyempo kon su bebe, i Derviş era el shef biblioteker del Muzeo Nasyonal de Bosnia. Se enteresava spesyalmente en las kontribusyones djudias a la kultura del pais. Un egzemplo de esta kultura djudia era la Agada de Sarajevo del siglo XIV, un tipo de artefakto ke Hitler pensava konservar en un "Muzeo de una rasa ekstinkta" despues de aver matado a todos los djudios de Europa.
Derviş estava konsyente de su importansya i tomo todas las prekosyones para salvarla durante la okupasyon almana. Kuando el komandante Nazi Johann Fortner arivo al muzeo para demandar i mas egzaktamente para tomar la Agada, Derviş la eskondyo debasho de su djaketa para ke el ekipo de Fortner no la tope en bushkandola en el muzeo. Mas tadre, Derviş salyo silensyozamente del muzeo i dio el presyozo simbolo de la vida djudia a un imam muzulmano ke biviya en esta sivdad. El imam, lo eskondyo en la biblioteka de su meshkita, ande la Agada de Sarajevo, uno de los mas famozos manuskritos ebreo iluminados, se kedo eskondida asta la fin de la gerra.
Despues de este insidente los esforsos de la famiya Korkut para ayudar a los djudios kontinuaron. Mira Papo era una ijika de la komunidad djudia sefaradi de Sarajevo. Kuando su padre i madre fueron asasinados a la fin de 1941, Mira se fuyo a las montanyas ande se izo myembro de los partizanos. En Marso de 1942, los partizanos se vyeron ovligados a reorganizarsen i trokar de taktika despues de munchas desfechas. Ordenaron a Mira i otras demuazeles ke tornen a Sarajevo. Mira tomo este orden komo una sentensiya de muerte, ma tambyen kedar sola en las montanyas era la mizma koza.
Kuando entro a la sivdad, topo al konsierj del vyejo ofis de su padre i le rogo ke le ayudara. El konsierj la yevo al Muzeo Nasyonal de Bosnia i la prezento a Derviş Korkut. Derviş la tomo a su kaza ande konosyo Servet tambyen. Derviş i Servet teniyan un plan: Mira se iva vistir komo una muzulmana tradisyonal, iva tener un nombre muzulman, Amira, i ivan a dizir a los ke demandavan ke eya lavorava en la famiya komo dada del bebiko. No deviya avlar kon dingunos aparte de la famiya porke en la zona ande biviya la famiya Korkut aviya albanezos kolaborando kon los Nazis. Durante los sigientes sinko mezes, Mira se kedo en la kaza kon Servet. Un ofisyer alman biviya en el segundo etaj de la kaza, ma no teniya motivos para interrojar la sirvyente muzulmana. Mira se espartyo de Derviş i Servet en Agosto de 1942 kuando su tiya pudo topar papeles falsifikados i un bilyeto de treno. Kon los papeles falsos, Mira arivo a la kosta de Dalmatia i aya se izo konoser komo no djudia durante el resto de la gerra.
Todos sobrebivyeron la gerra. Derviş Korkut muryo en 1969. Servet Korkut muryo el 9 de Septembre de 2013, a la edad de 88 anyos.
Transladado i adaptado de un artikolo de Jewish Foundation for the Righteous.
