Una sivdad polaka konstruyo un monumento por los judyos ke konstituavan kaji la mitad de su populasyon antes del Olokosto. Este monumento es parte de un proyekto lokal mas grande, sovre la istorya judiya. El projekto fue finansado por las otoridades lokales i el Ministeryo de Relasyones Eksteryores de Polonya.
El muevo monumento en Gorlice - una sivdad de 30.000 abitantes en el sur de Poonya - fue konstruido enfrente del simeteryo judyo. Este es el simeteryo de los judyos ke fueron asasinados por los nazis alemanes durante la Segunda Gerra Mondyal.
El monumento, konstruido en forma de la Estreya de David, kontyene pedasos de matzevot (pyedras de tombas) ke fueron ekskavadas en el anyo 2015 debasho de la planta de una antigua sinagoga en la sivdad.
"Este es un lugar de rekuerdo de muestros vizinos, konosidos, amigos, personas ke disparesyeron de Gorlice", disho el alkalde de la sivdad, Rafał Kukla. "Un lugar kreado para ke la memorya de muestra istorya komun i los terrivles evenementos de la Segunda Gerra Mondyal nunka seygan olvidadas". “Tambien es una lisyon de istorya; sovre kaji la mitad de los abitantes de muestra sivdad eran de orijen judyo, i oy no estan mas aki. Malorozamente no kedo munchas trasas de eyos”.
Antes de la gerra, Gorlice teniya una komunidad judiya prospera, ke teniya munchas empresas reushidas i una intelektualidad ke estava floresyendo. A la fin del dizimueven siglo, uvo muvimyentos antijudyos. Ma, en komparezon kon las otras sivdades de la rejyon, las kondisyones para los judyos de Gorlice "eran muy favoravles", esta eskrito en el Virtual Shtetl, ke es un sityo web administrado por el Muzeo de Istorya de los Judyos Polakos. Despues de la envasyon alemana en septembre del anyo 1939, los judyos de Gorlice, komo en el resto de la Polonya okupada, se enkontraron kon kondisyones kada vez mas negras. Munchos judyos fueron utilizados en lavoro forsado, i en 1941 disheron ke la komunidad judiya va bivir en un geto kreado en la sivdad.
El anyo sigiente, empeso la likidasyon de este geto. Munchos judyos fueron asasinados en Gorlice i munchos otros fueron embiyados a las kamaretas de gaz en Bełzek. De una populasyon de 4.500-5.000 judyos de antes de la gerra, solo 200 judyos sovrebivyeron al Olokosto. Despues de la gerra, alrededor 30 famiyas judiyas tornaron a la sivdad, ma munchas de estas famiyas emigraron mas despues, prensipalmente a Israel.
En el anyo 1995, se alimpyo el simeteryo judyo de la sivdad i se konstruyo una mueva muraya a su alrededor. En el anyo 2012, en una otra antigua sinagoga, se enstalo una plaka en la onor de la komunidad judiya asasinada, i en el anyo 2016, se renovo un ohel (una estruktura konstruida alrededor de una tomba judiya) en la tomba del rabino Baruch Halberstam.
El muevo monumento, ke fue konstruido afuera de los terenos del simeteryo para respektar el kostumbre relijyozo judyo, se yama "Sidur de los transeuntes’ (un sidur es un livro de orasyones judiyas). Los pedasos de pyedras de las tombas judiyas ke estan enkolgados alrededor, se rekuperaron antes de la demolisyon de una antigua sinagoga en Gorlice en 2015. El alkalde ekspreso su satisfaksyon, ke agora tyenen "un lugar dinyo", i disho ke el lavoro entero se izo kon la kooperasyon de Polonya.
