Eden Israel
Keridos Lektores, grasyas por meldar mis artikolos!
El Brasil de oy en diya fue kolonizado por los Portugezos. Fue en akeya tyerra la kreasion del Primer Kal de las Amerikas, el Kahal Zur Israel situado en la sivdad de Recife, en el Estado de Pernambuco lokalizado al Norte del payis. Oy, la sigunda mas grande komunidad djudia de Amerika Latina se topa en Brasil. El djudeo-espanyol tyene mas de 30 000 favlantes en komunitas sefaradis en Brasil, pero esta kantidad sige abashando anyo tras anyo.
La Yegada del Djudeo-Espanyol en el Muevo Mundo
La formasyon de una komunidad djudia en Brasil tuvo lugar en la Primera mitad del siglo XVII, favoresida por la libertad relijiosa del governo Olandez de Mauricio de Nassau. Durante los syete anyos de seguridad bajo Nassau, entre los anyos 1637 a 1644, uvo una migrasion djudia kontinual ande todos los mezes yegavan los djudios a Recife para tener la oportunidad de kedarsen bien kon sus famiyas en la mas rika koloniya Portugeza. Para los djudios sefardis instalados en Recife, ademas de la motivasyon relijiosa, avia el interes ekonomiko porke teniyan atadijos komersiales kon empresarios olandezes siendo muy emportantes en el dezvelopamiento de espanyol a una lingua prestijioza.
La komunidad era kompuesta de 600 famiyas, komo los numeros se kedaron grandes, la Kongregasion de Amsterdam envia para Recife el Shefe relijiozo Rabino Isaac Aboab da Fonseca, el Haham Rabi Sefaradi Portugezo. El Rav Fonseca fue el primero relijiozo de orijin djudia ayegar en Brasil i fue el primer eskritor en ebreo del Muevo Mundo, eskriviendo sus ovras en ebreo i kastilyano.
La fondasyon de la Kongregasion, la konstruksion del Primer Kal de las Amerikas i la konstruksion de las eskolas relijiozas Talmud Tora i Etz Hayim son de este peryodo. Tambyen avia un sementerio djudio, afuera de la sivdad, donde oy esta el Bairro dos Coelhos.
Kuando los olandezes pedrieron la gerra kontra los portugezos, los djudios se fueron de buelta a Olanda, otros al Amerika del Norte i munchos se kedaron en Brasil debasho la dominasion Portugeza. Los miembros de la kongregasion ke salieron de Brasil para los Estados Unidos fondaron una grande Kehila, kon el lider Rav Aboab da Fonseca, en el lugar denominado Mueva Amsterdam se konstituyo la Primera Komunidad Djudia de la Amerika del Norte. Oy, la sivdad de Mueva York.
El lugar donde avia el Kahal Zur Israel en Recife fue modifikado a lo largo de los anyos. Aktualmente, para reskatar esta tan rika erensya sefaradi, fue restorado el lugar donde teniya el kal. Asi fue kreado el Sentro Kultural Kahal Zur Israel kon un muzeo konstituido de dokumentos i deskuvrimientos arkeolojikos aziendo una grande kontribuiion a la istoria de los djudios sefaradis de Brasil i del mundo.
