Los Judios tienen un aborresimyento kontra los tatuajes. Mizmo los judios laikos son kontra de esto. Seya ke les aze akodrar los numeros ke engravavan a los brasos de los judios del tiempo del Olokosto o seya ke es defendido en la ley de azer tortura a su puerpo. Vemos de mas en mas tatuajes en los mansevos del mundo. Ay personas ke se azen mizmo al puerpo entero. Este echo de tatuaje endjida. Me enkanto komo rezisten a esta dolor. Para mi es “kitarsen el nur” komo diziya mi madre. Ay tanbien una kreensya ke si uno tiene tatuajes, no lo enterran en simeteryo judio.
Es ke los tatuajes violan las leyes Judiyas? Munchos hahames dizen “Si”. Sus objeksyones vienen de Vayikra 19.28 ke dize: No vash a firrir vuestro puerpo para matarvos. No vash deshar dinguna traza dinguna ensizyon en vozotros. Yo so vuestro Dio. Aki el biervo ensizyon se puede tomar tanbien komo tatuaje. Rashi dize ke esto kere dizir de no azer alguna koza mahsus, ke keda por siempre, la vida entera ensima del kuero del puerpo.
Esta ley es metida tanbien para separarmos de los paganos porke eyos se aziyan munchos sinyos kon kuchiyos ensima de eyos asta ke kitavan sangre, para amostrar sus devuamiento a sus Dios Paganos.
Los hahames Reformistos miran esta kestion kon tolerensya, por otra parte los hahames ortodoksos dizen ke el tatuaje es un akto de orgolyo i ke es totalmente kontra muestra ley. Los hahames akseptan ke sus djuzgos son subjektivos i yenos de konfuzyones. En 2014 una revista ke se yama Reform Judaism, publiko en su kacha un artikolo kon figuras de tatuajes apropriados al judaizmo. Marshal Klaven, un Rabino reformisto de Teksas ke tiene tatuajes, eskrivio una teza ensima de tatuajes, dize ke es akseptado si alguno se aze tatuajes kon tema de las tradisyones Judias. No es defendido.
Malgrado ke ay leyes muy striktas por los tatuajes, Amy Winehouse ke teniya munchas tatuajes, fue enprimero ensinerada (kemada) ke es otruna violasyon de la ley judiya, fue despues enterrada en un simeteryo judio.
Tener tatuajes sera una razon para dezechar una persona? El Rabino Alan Lucas del muvimiento konservativo dize ke esto no es una razon, i los ke tienen tatuajes pueden ser akseptados a la komunita judiya. Ay mizmo rabinos ke dizen si uno tiene tatuajes ke son vizibles no deven de entrar a las sinagogas para meldar la Tora. Ama esto no es una razon para dezechar un judio.
El Rabino Marc Dratch es vis prezidente del konsilyo ortodokso rabiniko de l’Amerika disho si los tatuajes son defendidos, kualo van a azer los doktores kon los tatuajes medikales. En vezes azen tatuajes ensima los puerpos para atirar la atansyon al estado del hazino para ke agan atansyon ke esta persona tiene esta hazinura. Kuando depende de la vida del umano todo es permetido asigun la ley de Pikuah Nefesh. En vezes los medikos empleyan el tatuaje para shirurjiya rekonstruktiva.
Si uno se arepintyo de tener tatuajes i los kere efasar de su puerpo, es defendido porke i este akto tiene una sufriensa.
