Saver es Bueno Isak Eskinazi
La Agada de Pesah mos konta la salida de Ayifto ma no mos dize nada sovre Moshe i el Paro ke no mos keriya deshar salir. Mos konta toda la guayas ke afito a Misrayim i por fin a los bohores de este payis, ama el nombre del Paro ke perdyo a su ijo bohor, no se ve en dinguna parte de la Agada. Así los istoryadores bushkaron en la istorya bazandosen sovre syertos dokumentos i evenementos para topar ken puediya ser el Paro ke koryo detrás de los Djudyos para pedrer su armada en las aguas del <Yam a Suf>, <Mar Korolada> o <Mar de Kanyas>. Una koensidensya mos mostra ke la palabra “suf” del Ivrit, en inglez se dize “reed”. No se si la traduksyon del Ivrit al inglez, izo la “Kanya” <korolada>: “reed – red”, porke kanya es suf en ivrit.
Si la data de la salida podría ser el siglo 15 antes de muestra era, esto koresponde al reyno de la dinastiya 18. Según Douglas Petrovich i Rodger Young, el paro de la salida devriya ser Amenhotep II (1455-1418 A.M.E) (Antes de Muestra Era) i después de el vino al trono su ijo Tuthmoses IV (1418-1408 A.M.E) ke savemos según la <Stela del Esfuenyo> ke esta delante del famozo “sfenks”, ke no era el bohor de los ijos. Esto da a pensar ke el bohor muryo kon la dyezen guaya ke era la muerte de los bohores de los Misris (Los non Djudyos de Misrayim).
Otros atestan ke la Salida de Ayifto afito en el anyo 1267 A.M.E bazandosen sovre la Stela de Merneptah ande vemos la enskripsyon la mas vyeja del nombre de Israel o del nombre ke se supoze ke es Israel según las figuras de la iyeroglafiya de la epoka. Merneptah fue el paro ke reyno en los años 1213-1203 A.M.E. i era el tredjen ijo del famoso paro Ramses II. No olvidar ke ay también djente ke atestan ke el Paro era Ramses porke se avla de un kazal ande bivyeron los djudyos yamado Ramesses ke figura en la Tora basho el nombre de <Goshen>.
Una otra tezis es ke el paro de la salida puediya ser Amenhotep III ke reyno entre los anyos 1390-1353 A.M.E.. En el primer livro de los Reyes, meldamos ke La Salida se izo 480 anyos antes de la inogurasyon del Bet aMikdash, konstruido en el anyo 966 A.M.E. Esta data koresponde absolutamente kon el reyno de Amenhotep III. El primer ijo de este paro muryo de una epidemia muy grava. El ijo ke paso al trono se yamava Amenhotep IV trokando su nombre en Akhenaton o Amenophis ke reyno entre los anyos 1353-1336 A. M. E.
Akhenaton es konosido komo el paro ke aboresyo los dyos tan nombrozos ke egzistiyan en Misrayim i se dediko a adorar un solo Dyo, una konsepsyon ke no fue mas akseptada en Misrayim después de su muerte. Algunos komparan el monotheismo de este paro kon el kulto de Moshe. Otros dizen ke todo esto es una Agada.
