60 anyos pasaron!
El proverbo dize: “Bien guadrado, mal topado“.
Malgrado la pandemia, fue un mirakolo para mi. La emosion kuando deskuvri la kamizika kon la dantela ke kuzi kon amor. Me enkanti de ver ke el punyado de drajés/konfites tambien estavan emburujados kon la kamizika larga.
Porke larga?
Por el simbolo de una vida larga i buena.
El rezin nasido, primeriza i ijo, se vistio esta kamizika el Dia de Berit-Mila.
Antes anyos yo, futura madre, estava entornada por mi espozo i la famiya ke kudyavan i se preokupavan de mi salud, miravan a kumplir todos mis dezeos.
La seremonia de la kortadura de fashadura se avia fiestado. Mi luzya i devuada madre avia envitado la famiya grande.
La foto es la kamiza ke me tresali de topar en aziendo echos de PESAH.
Mi madre, ke este en Ganeden, si le kontava, me iva dizir:
“Mashalla, topates lo ke bushkates tanto tiempo, en un bogo en el fondo del baul - despues de haloshentos anyos!“
Di uti a la kamizika i la guadri de muevo, kon los bonbones. Me demando ke va ser su sorpreza kuando la amostro a mi ijo...
Keridos lektores, vos sueto una fiesta de Pesah kon mirakolos.
HAG PESAH SAMEAH.
