La semana pasada en dos diyas tuvimos mas de 17-18 personas ke vijitaron el Muzeo. I reelmente estamos muy kontentes kuando vemos tanta (!!!) djente. Este mez tuvimos dos vezes emportantes musafires. Kero rengrasyar a İzak İbrahimzadeh, uno de los prezidentes de la komunidad ke preferó de envitarlos en el muzeo. El primer era el Ambasador de la UE ke se topa en Ankara. Vino kon tres personas. Una mujer entre los tres, ke konosemos es responsavle de los fondos EU. I kreo tenyendo buenas relasyones vamos a realizar muevos proyektos kon los fondos de la EU. Oy estamos lavorando kon un proyekto ke es finansado por el EU ma ke es debasho de la direksion de la Fondasyon Hrant Dink. El segundo fue el Konsul d’Estanbol de la Espanya, el Sinyor Alvaro de la Riva Guzman. Le aprometi ke lo vamos a vijitar en su posto kon Karen reprezentando el Sentro Sefaradi. I me disho ke va ser muy kontente. Entre lo ke avlimos mos dyo una novela emportante. Estan avriendo una eskola en Tarabya ke va ensenyar en Espanyol. I kreo ke esto va ser bastante enteresante para la djente.
Kada anyo estamos resivyendo fondos de la Fundasion Rotschild de Londra ke mos ayudan bastante. Es una fundasyon muy seryoza. Es siguro ke mos demanda un alay de kozas antes de dar moneda.
Ya savesh ke tres vezes amostrimos filmos. El dalkavo era sovre el arkitekto i planero de las sivdades, el famozo Aron Ancel. Mizmo esta vez fuimos segidos por mas de 300 personas. El zoom despues de este Covid fue un medio de komunikasion muy emportante. Pensamos de amostrar el filmo sovre Rosa Eskenazi, kantadora de rebetikos. El nombre en Inglez es “My Sweet Canary”. Si tenemos la permision del direktor del filmo lo vamos a mostrar. Si no, estamos organisando otro filmo.
Ay unas kuantas semanas ke en las vendidades sovre el internet en primero vendyeron tres albumes de fotografiyas de una famiya djudia; i esta semana vendyeron 150 letras en fransez i en turko eskritas entre los anyos 1940 i 60. Ensima de las letras se topava el nombre del sinyor Marko Kohen. No se ken es. Demandi a mis amigos si deviamos de merkar estas letras. Me disheron ke deven de ser muy enteresantes. I los merki. Vamos a ver lo ke kontyenen estas letras. Puedeser no son muy enteresantes. Mizmo se puede eskrivir un livro sovre estas letras. Ken save? Si no mos entereso muncho de punto de vista de muzeografia lo va proposar a Lizi Behmuaras para ke los melde. Es eya ke puede eskrivir un livro sovre estas letras.
Ay unos kuantos mezes ke me esto okupando de la publikasion del livro “Las Sinagogas de Turkiya”. Estamos aziendo la segunda edision. Es el famozo İzzet Keribar ke travo las fotografias; i es Naim Avigdor Güleryüz ke eskrivyo la isyoria de estas sinagogas.
Eskapando el segundo volum, oy pude avlar kon Nesim Bencuya sovre el proyekto ke estan realizando en la klaleja de los Kales restorando 6 Sinagogas. Reelmente una grande reushidad. Una komunidad de apenas 1.000 personas ke estan realizando un proyekto muy emportante kon la restorasyon de 6 keilas en la mizma maalle, mizmo una partida en la mizma kaleja. Es el sinyor Nesim Bencuya ke es responsavle de este proyekto. I kreo ke lavora diya i noche para su realization. Ke asperan de esta restorasion? Los Djudios Izmirlis i la sivdad de İzmir estan asperando buen karar de turistos kon este proyekto. Mi opinion es ke se deve de avrir un restoran ke va gizar komidas sefardis de los İzmirlis. Este restoran kreo ke va tener un grande sukseso! si se puede realizar. En Estanbol no lo reushimos ma de ke no en İzmir? La mas grande partida de los mushteris van a ser los turistos. Vemos mizmo en el muzeo ke la mas grande partida de los ke vijitan el muzeo son los turistos Djudios i los ke no son Djudios. Les sueto una grande reushidad.
