Una Sefertora muy antigua fue topada en el bagaj de un oto aryentro de un sako, embrujado en naylones.
El viernes, 26 de Marso 2021, las Fuersas de Seguridad Turkas toparon en el norte de Samsun, una Tora de 2000-2500 anyos eskrita kon letras de oro.
Sigun una denunsyasyon, la polisiya turka areto dos otomobiles, ande toparon esta Tora eskrita de mano. Ma por modo de razones de investigasyon, no disheron los nombres de los suspektos. La polisiya topo este objeto istoriko en eskarvando los bagajes de los otomobiles. Los Polises vistyeron guantes antes de tokar esta ovra muy presioza.
Reuters disho ke sinko personas fueron detenidos.
I mas antes tiene afitado kavzos semejantes ke toparon Sefertoras en diferentes rejiones de la Turkiya. Estas Sefertoras son todas eskritas de mano kon letras de oro. No se save komo i de ande las topan a estas ovras tan presiozas.
* * *
Dos semanas antes un vapor grande de 220 mil tonas, se kedo en medyo del Kanal de Suez. El vapor de konteyneres “Ever Given” se asento al dip de la mar en tapando el kanal entero al trafiko maritimo, porke estava en forma kruzada. Todos los esforsos para salvar el vapor fueron en vano. No saviyan kualo azer. A la fin un mirakolo salvo el vapor de si para si. Este mirakolo era el mizmo mirakolo del diya ke salimos de Ayifto. I por grande koensidensya esto afito en Pesah. El primer diya de Pesah ke aviya lunar, las aguas del Kanal de Suez pujaron i el vapor ampeso a nadar. No se si este kavzo atiro la atansyon del mundo. Pishin lo yevaron a lugares mas ondas para ke pueda nadar mas fasilmente. Siguro ke entremientes uvo muncha piedrita de tiempo i komersiyal, seya de la kompanyiya maritima del vapor o seya del Ejipto. Agora las sosyetas de seguritas tienen grandes dertes.
* * *
En la Olanda, una fabrika de matza distribuyo matzas a 35.000 elevos. Kada elevo tomo dos matzas, ke ansina aze 70.000 matsas ke fueron distribuidas. Este jesto era una tradisyon ke sureyava desde 50 anyos. La fabrika de matza “Hollandia Matzes” tiene kaje 20 lavorantes i el patron no es judio. Desde 50 anyos, envitan a todos los elevos del este del payis a Enschede, ke se topa a 100 kilometros leshos de Amsterdam, para ke vengan i tomen sus matzas. Los Woudstras establesyeron esta fabrika en los anyos 1930. Enshede era una en sentro de tekstil, kon miles de judios en akeyos anyos. Munchos fuyeron de aya por modo los Nazistos.
