La seremoniya de "Oscar 2021" va tomar lugar el 25 de Avril. Los nominados de los premyos Oscar, ke van a ser entregados por la 93a vez por la Akademya Amerikana de Artes i Sensyas Sinematografikas, ya fueron anonsados. La seremoniya de Oscar ande los premyos Oscar van a ser anonsados, este anyo, fue remetido al 25 de Avril por modo de la pandemiya de Koronavirus.
El filmo en blanko i preto "Mank", sovre el direktor de orijen judyo Herman Mankiewicz, fue el filmo ke tomo las mas munchas nominasyones. 'Mank' gano 10 nominasyones por el Oscar, ke es kaje la mitad del total de nominasyones de Netflix, (el mijor filmo inkluido). El filmo Mank fue dirijido por David Fincher. El aktor judyo Gary Oldman esta djugando el rolo de Herman Mankiewicz.
El filmo 'The Trial of the Chicago 7’ ke tomo sesh nominasyones por Oscar fue eskrito i dirijido por el direktor i eskritor judyo, Aaron Sorkil. El aktor Sacha Baron Kohen fue nominado por el rolo del segundo aktor por su rolo del aktivisto judyo Abbie Hoffman en este filmo. Syete de los karakteres en la estorya del filmo son judyos.
Nominado por el mijor dokumental (la produksyon echa sovre Barack Obama i Michelle Obama), el dokumental de Netflix 'Crip Camp' esta kontando la istorya de los mansevos inkapasitados (uno de eyos syendo la aktivista judiya, Judy Heumann) ke asistieron al Kamp Jened en el norte de New York en el enverano del anyo 1971. Judy Heumann disho ke este filmo sovre los inkapasitados va ser el primer filmo nominado por Oscar i esta suetando ke otros lo sukseden.
El kurto filmo israelyano ‘White Eye’ esta nominado por Oscar komo el mijor kurto metraje.
La kompozitora de orijen judia, Diane Warren fue nominada por su kantika 'Io si' (visto) por el filmo de Sophia Loren, 'The Life Ahead' ke es un filmo sovre el Olokosto.
