Viernes pasado fiestimos la 101. Aniversaryo de la fondasyon de la Asamblea Nasyonala de Turkiya, ke es la komemorasyon de la soverenedad de muestro pais, deklarada el 23 April 1920. Este grande evenimyento fue dedikada por el fondador de la Turkiya moderna Mustafa Kemal Ataturk, a las kriyaturas. Es una fiesta muy alegre komo dize la kantika “Bugün 23 Nisan, neşe doluyor insan.” Las kriyaturas se visten vistidos de kolores a kolores, se fiesta en las eskolas i en las kayes. Se aze paradas, kantes i bayles kon las bandieras turkas en las manos, en las kazas en las eskolas i todo modo de lugares. Antes munchos anyos el governo envitava grupos de kriyaturas del mundo entero. Ma en estos anyos dalkavo sovre todo estos dos anyos no se pudo fiestar malorozamente esta fiesta en dingun lugar. Solo kada uno en su kaza i en los programes de las televizyones. Inshalla al anyo ke viene kon sanedad…
************
Un otro evenimyento es el echo de “Bitcoin”, kon la novedad del golpe de 200 milyares de dolares ke fuyeron afuera del payiz. I yo komo muncha djente no pude entender nunka, kualo es este Bitcoin. Por el momento lo ke se save es ke esta es una para ke bola en el aver, sin ke entre a muestra aldikera. Sigun la empresyon ke tomi es ke no ay dainda una regulasyon sovre este sujeto. Esta valor dijital no esta dando konfiensa al puevlo. Ma kreyo ke en el futuro este bitcoin va entrar a muestra vida de kada diya. Entremientres el governo defendyo ke esta para “Kripto” seya empleyada en el komerso.
***********
Otra novedad de la aktualita de la diplomasiya, fue lo ke iva dizir el Prezidente de Los Estados Unidos Joe Biden, sovre el diya del 24 Avril. El disho ke en el 24 Avril afito un Jenosidio kon los Ermenis, en el Imperyo Otomano. Agora vamos a ver la reaksyon de la Turkiya. Esto es muy emportante.
Vos auguro una semana kon salud i alegriya.
