La madre del Prens Phillip, la prenseza Alicia era sodra i saviya meldar los mushos. Era kazada kon el Rey Andres de la famiya grega. En la Segunda Gerra Mondyal, Gresya fue okupada por los Nazis i los nazis aviyan empesado a deportar los judyos a los kampos de eksterminasyon en Polonya en 1942. Haimaki Kohen era un myembro judyo del parlamento grego i era konosido por la prensesa Alicia. Haimaki muryo en 1943, kuando se aviya fuyido del payis. La prenseza Alicia, ke aviya ayudado a los refujyados en la Kruz Kolorada Sueka i Suiza, avriyo las puertas del palasyo a la famiya Kohen. Los tres ijos de Rachel Kohen se fuyeron a Ejipto a traves de la Turkiya. La prenseza Alicia las eskondyo a Rachel Kohen i a su ija Tilda en el treser etaj de su palasyo. Los Kohenes kedaron en el palasyo 13 mezes. La prenseza los estuvo vijitando i les ayudo para ke esten en kontakto kon el mundo de afuera porke uno de los ijos no aviya pudido entrar a Ejipto. Lo toparon i lo yevaron al palasyo. Ayudar a una famiya judiya era danjorozo, espesyalmente para la prenseza Alicia, porke las tres de sus kuatro ijas eran kazadas kon prenses ke eran ofisyales de la SS. Su ijo Phillip teniya 18 anyos i era soldado en la Marina Britanika.
Un diya, los fonksyonaryos del Gestapo vijitaron el palasyo en Atenas i sospecharon ken biviya ariva. La prenseza komo era sodra, izo komo no los estava entendyendo i les disho ke una mosa biviya ariva.
La grande majorita de los 80.000 judyos de Gresya fueron asasinados en el Olokosto. La prenseza Alicia fondo un konvento en Atenas para ayudar a los nesesitados. Despues de un golpe al payis, torno a Bretanya para estar serka de su ijo i su mujer la Reyna, i empeso a bivir en el Palasyo de Buckingham, dedikandose a ayudar a los nesesitados.
Alicia muryo en 1969 i dizimueve anyos despues, fue enterrada en Yerushalayim komo eya lo aviya dezeyado. Alicia aviya deshado toda su posesyon a los nesesitados.
En 1990, la famiya Kohen se adresaron a Yad Vashem formalmente para ke la prenseza Alicia fuera rekonosida komo una de las Djustas de las Nasyones, i en 1994 el prens Philip izo una vijita privada a Israel para plantar un arvole en memorya de su madre. Phillip fue envitado por el presidente de Israel, Ezer Weitzman. Despues el vijito la tomba de su madre i paso un tyempo avlando kon la famiya Kohen i sus desendyentes, ke deviyan la vida a su madre. En la seremoniya, Philip disho ke su madre nunka les aviya disho ke salvo la famiya Kohen.
En 2018, el inyeto del prens Philip, el prens William, en su primera vijita ofisyal del estado, vijito la tomba de Alicia i tambyen konosyo Evy Kohen, inyeta de Rachel Kohen, i su primo Philip Kohen. Mas despues Evy Kohen disho ke el prens William estava muy orgoyozo de saver ke su bisnona aviya salvado su famiya. El primo de Evy Kohen le disho ke deven sus egzistensya a su bisnona i ke eya fue muy korajoza porke echo al peligro su propya vida para salvar una famiya nesesitada.
