Hayim Behmoaras
En las makinas de foto, o en las kameras ay un mekanizmo ke se yama zoom, lo ke keremos travar o mos aserka, o mos alesha. Esto ya lo savemos.
Ma el zoom ke vos va kontar, no es este modo. Kon esta negromazal de korona ganimos una koza maraviyoza ke se yama Zoom. La ermozura es ke solo mos esta aserkando a todos, kon esto estamos avlando kon los ijos, kon la famiya, kon los keridos, amigos, i mas estamos azyendo las tradisyones kon el, las fyestas kon el.
Kon el zoom estan lavorando de kaza, i teatro bile estan djugando, si por mi vida
i komida estan gizando en el zoom para ke se anbezen los mansevos. Ken puediya imajinearse ke un diya va vinir un zoom, i mos va tomar a todos aryento, para ke mos pase el eskarinyo, para ke estemos endjuntos. En vezes 10, o en vezes 100 personas lado kon lado, sin maska, i sin espanto de la korona.
Te abraso de alma i de korason, i te beso de dos partes Zoom pasha. En estos diyas aleskuros te izites luz en las kazas muestras.
Todo bueno ke tengas...
