La “MADRE” es sakra. Eya mos tuvo djusto mueve mezes en su tripa i aze todos los sakrifisyos, mizmo los mas difisiles. Kada madre es muy spesyal por sus ijas i ijos. La kerensya, el amor de madre es el sintimyento el mas kayente del mundo i el mas supremo. No se puede komparar kon kualker kerensya. Las madres son los andjelos sin alas, mos protejan de todos los males del mundo. Si mos atristamos por una koza, les aze grande pena. Eyas bushkan remedyos para los problemes.
Estamos fyestando este dia en la Turkiya desdel anyo 1955 ofisyalamente, el sigundo alhad del mez de mayo. En este dia universal, en el mundo entero milyones de madres son mensyonadas por sus ijos kon kerensya i respekto. Un regalo chiko u mizmo una trandafila solamente ke vyene del korason les aze plazer. Es un pensamyento!...
La madre es una egzistensya fantastika ke gole al miskle, es un arvole de pasensya, es un monumento de fuersa ke proteja su marido i sus ijos, es una mujer ke menaja a todos en su kaza i en su famiya, es limpya, es ordenada; eya abolta todos los echos de su kaza, es una persona ke asigura el ekilibro entre la famiya.
Eya da su kerensya sin asperar nada del den frente. Yena de kerensya es devuada, es kultivada, yena de sentimyentos; kuando sus ijos estan tristes yora kon eyos i da el apoyo menesterozo.
Es un andjelo ke kere byen syempre al den frente sin dinguna replika. Mizmo si no keremos, eya esta syempre allado de mozotros, mizmo ke mos engrandesemos, en su ojo syempre semos kriyaturas.
El manko de todo se puede inchir, ma el manko de una madre nunka no se inche.
- Eya puede asperar fina demanyana sus ijos en rezistyendo a su esfuenyo,
- Eya puede aprontar tres modos de komidas en una ora i la salata endjuntos, dandole a komer a su chiko en mizmo tyempo,
- Eya no se kesha mizmo ke se alevanta sinko vezes en una noche,
- Eya yeva a kaminar a sus ijos para ke profiten del oksijen, del aver limpyo,
- Eya no aparta a sus ijos i syempre los toma debasho de sus alas,
- Eya pardona mizmo si esta muy triste.
Kuando su ija va ser novya u su ijo novyo, kuando sus ijos seran diplomados, kuando el ijo va echar un gol en el mach de futbol, kuando su ijo se va iyir al servisyo militar, ampesa a yorar, porke eya pensa syempre a lo bueno de toda su famiya.
- La Madre es una buena avokata. Mizmo si tyene una kulpa, eya te defende de aryento de su korason i lo aze kon muncha kreensa i konfiensa.
- Es una buena doktora, si te azes hazino, para pueder meterte en pyes, eya lavora kon toda su fuersa.
- Eya aze buena politika. En kaza eya dirija a todos.
- Eya es una buena psikologa. Da emportansa a los problemes i ayuda para pueder solusyonarlos.
“MADRE” es la sola persona ke no se puede deskrivir kon los byervos.
Felisito a todas las madres, ke seygan syempre entornadas de sus famiyas.
