La semana pasada estavamos en kaza todo el Bayram porke no teniamos la posibilitad de salir a la kaye. Es djusto ke kada diya kon una bolsa en la mano salimos a la kaye para kaminar a lo manko 4-5.000 pasos. Ya savesh ke los dalkavos anyos mos disheron ke deviamos de kaminar a lo manko 5.000 pasos al dia. El ideal es de kaminar a lo manko 10.000 pasos.
Diya de djueves un amigo mos disho ke los mansevos se estan indo a la Bulgaria para azersen vaksinar kon el vaksin Biontech. I despues ke di estas informasyones en diferentes sitios de whatsapp munchas personas empesaron a espipitar. I kontaron lo ke saven. I despues mos ambezimos ke los ke se fueron a la Bulgaria i los ke se van a ir diya de vyernes serka de 40-45 arabas kon kada una kon kuatro personas se fueron a la Bulgaria para vaksinarsen. En primero mos disheron ke esto se esto realizando solo por los sivdadinos de los Estados Evropeos komo la Espanya i el Portugal. Ma despues me ambezi ke los ke no tyenen mizmo una de estas nasyonalidades i ke son halis Turkos se vaksinaron.
No se si savesh oy en dia en las Amerikas todos estan bivyendo komo ke la Corona no egzistio. Los Estados Unidos es uno de los payizes ande tuvyeron lo mas muncho de muertos. Oy lo ke vaksinaron es los 47 % de la populasyon. Ya savesh ke la populasyon de los Estados Unidos es 330 milyones i 155 milyones fueron vaksinados solo una vez. Los ke fueron vaksinados dos vezes son los 37%de la populasyon i son serka de 120 milyones de almas. Mizmo este nombre de vaksinasyon fue bastante para pueder bivir komo biviyamos un anyo i medyo antes.
Komparando a muestro payis ya savemos ke tenemos una populasyon de 84 miliones i savemos ke los 27% son kreaturas ke tyenen manko de 17 anyos. La populasion ke devemos de vaksinar es de 60 milyones. Los 65-70% de esta populasyon deve de ser vaksinados. Estamos avlando de 40 milyones de almas. I si ay un syerto nombre de personas ke fueron koronadas a lo manko 37 milyones de personas se deven de vaksinar 75 milyones de vezes. Estamos en los 25 milyones. I si lo ke el Ministro de la Sanedad realiza esto todo se va realizar a la manko fin de septembre. Ay kozas ke son muy emportantes. Los elevos se deven de ir a la eskola el anyo ke vyene si no, vamos a topar una jenerasyon kompletamente inyorente porke no kreo ke los estudyantes puedan ambezar las lisyones en el internet, sin ir a la eskola.
Muestros mansevos son bastante achikgoz. I kuando la Bulgaria empeso a vaksinar los ke tyenen pasaportos Evropeos todos, no se komo tuvyeron haber, koryeron para vaksinarsen. Eskrivi noche de vyernes i syertos despues ke izyeron sus testes estavan en kamino mizmo dia de shabat. Reelmente esto fue una okazion. Oy lunes mos disheron ke syertos ospitales no estan mas aziendo estos vaksenes. Ma no estan deshando. Se estan indo a otros ospitales. Si no reusheron se estan kedando en Bulgaria para reushir un dia despues. Salud buena a todos!
