Aldo Sevi
Kreo ke la majoritá de los meldadores konosen una komida (i pue’ser mas ke una) ke se yama armi o armiko. Mi madre lo gizava kon karne de vaka, igadó de gayna, patata, karota, sevoya, shampinyones i sos de tomat. Kuando me engrandesí me dí kuento ke ay munchos chesithes de armi. Kaji kada famiya tiene su propio armi. Ay ke lo gizan kon karne de kodrero, ay ke lo gizan kon karne de gayna, ay ke lo gizan kon todo modo de organos internos, i ay también variedades vejeterianas: armiko de tomat: una komida de tomates, pipirushkas i sevoya kon (o sin) arroz, armi de patata: una komida de patata i sevoya i armi de sevoya, ke ande los bulgaros se puede azer solo de sevoya sin nada mas.
Siempre me demandí de mi para mi por la orijín de la palavra armi. En mi chikez me imajinava ke armi viene de army en inlez (armada, fuersas militares). Es ke los djudiós otomanos se ambezaron esta komida de los soldados inglezes en la Gerra de Krimea? O, pue’ser en la Primera Gerra Mundial? La verdad es muncho mas simple. Armi viene del grego αρνι (arni) - kodrero.
Ande los djudiós gregos el armi es una komida de Pésah, kuando nasen los kodreros. Se aze de la karne de kodrero i todos sus organos internos. En primero se friyen la karne i los organos internos en un poko de azete de oliva, i después se gizan a lumbre basha, asta ke sean blandos, adjustando de vez en kuando un poko de agua. Media ora antes ke el armi sea pronto se adjusta vinagre i muez rompida. Anké mi madre no metía en su armi arni (kodrero), se puede ver ke su variedad guadró un elemento sentral del armi grego: karne ke se giza endjuntos kon organos internos. La verdad es ke el solo organo interno ke no me desgustava en mi chikez era igado de gayna. Si no, mi madre aparejaría el armi komo se lo ambezó de mi gramamá - kon rinyones, korasones, mersa…
El armi orijinal tenía de pasar muncho para azerse el armiko de tomat ke munchos konosen. Pensando en esto, me vino al tino una konsejika de Djohá, ke le vinieron amigos i les dió kaldo de gayna. Al otro día le vinieron los amigos de sus amigos - i a eyos les dió agua kaynte. Kuando se kesharon, les respondió: "Si mis amigos meresen kaldo de gayna, los amigos de mis amigos meresen kaldo de kaldo de gayna..." Si el armi orijinal es la gayna de Djohá, el armi de mi madre sería el kaldo de gayna i el armiko de tomat sería el kaldo del kaldo!
