Anyos antes, kuando vijiti el Muzeo Yad Vashem en Yerushalayim, ya saviya kon kualo me iva enkontrar ma no me imajinava ke me iva empresyonar tanto.
Este muzeo ke kontyene el mas grande depozito de enformasyones konsernando el Olokosto, es para los mansevos la mas grande fuente en la edukasyon de laShoah. Ay milyones de dokumentos i testimonyos sovre los sobrevivientes del Olokosto. Kada punto estash oyendo sus estoryas enrejistradas.
Los realizadores del Muzeo pensaron muy bueno, porke en lugar de transferar verdades sekas ke todos pueden topar en livros, eyos mos estan prezentando estoryas personales, ke son mas empresyonantes para los mansevos.
La Pared Memoyal en Yad Vashem ke es efektuada por Naftali Bezem, es una de las mas empresyonantes vistas del muzeo. Esta pared kontyene munchos sembolos. En el sentro, Naftali Bezem metyo el krematoryum ke parese a una fabrika kon su chimeneya de ande esta salyendo umos. En la syedra del krematoryum, se esta vyendo una kola larga de personas indosen a sus destino final. Debasho del krematoryum, ay la figura de una mujer tenyendo kandelas en las manos. Esta mujer es el sembolo de la mujer judiya kon las kandelas de Shabat. Ma, aki las kandelas estan alaroves i las flamas estan kemando los pechos de la madre, ke es el sembolo de la "fuente de vida". A la derecha, un peshkado kon la kavesa arankada del puerpo, esta salyendo del krematoryum. Este peshkado sin kavesa es el sembolo del 'silensyo' de las personas embiyadas a la muerte. Enriva del peshkado, estash vyendo las "alas de un andjelo" yevando el peshkado al paradizo.
La sigunda seksyon semboliza la 'revuelta'. La Sinagoga i las kazas de los judyos en flamas, pedasos de puerpos bolando en el aver. En un lugar, un mansevo esta tenyendo en una mano un fuzil, i kon la otra se esta detenyendo a una eskalera. Este mansevo es el sembolo del "gerreador judyo" i la eskalera sinyifika "suvir a las tyerras de Israel", i en mezmo tyempo es el sembolo de la "Eskalera de Yaakov" en la Torah.
La tresera seksyon reprezenta 'la Aliya', la salida del Olokosto. Un ombre firido se esta suvyendo a una barka.
En la kuatrena seksyon, el mezmo ombre esta ayegando a Israel. En esta seksyon, el firido se esta transformando en un leon. Ma, este leon esta yorando porke mezmo syendo muncho mas forsudo agora, no se esta puedyendo olvidar sus amarguras.
Las kandelas en las manos de la mujer no estan mas alaroves, se enderecharon agora. La "fuente de vida" ya empeso a koryer de muevo. En la kavesa del leon, estan kresyendo ojas de una planta. Esta planta es el fruto ke se yama "sabra", ke es el simbolo de la mueva jenerasyon de Israel.
Naftali Bezem, el grande artista ke kreo esta ovra, penso ke es su dover de komemorar el Olokosto, porke el fue un myembro de la jenerasyon ke testimonyo el Olokosto. El mas grande buto de Yad Vashem syendo de transferar a las futures jenerasyones la trajediya ke se paso akeyos diyas.
Los realizadores de este muzeo utilizaron la mas moderna teknolojia konvenyente para los mansevos, i la teknika la mas empresyonante, afin ke esta 'verguensa’ nunka seyga olvidada.
