El mez de mayo ya esta para eskapar. Pasimos una invyernada byen larga i muy aburrida, las nuvelas no estavan del todo famozas, la ekonomiya no se kere dicho, peryimos munchos konosidos i lo mas negro fue el no saver kualo se va azer.
Yo komo todos pasi el tyempo en los zoomes, en eskrivyendo artikolos al Şalom i a la revista EL AMANESER, i eskapi de eskrivir dos senaryos de teatro, uno enteramente en turko i uno para el Dia del Ladino, si el Dyo mos da vidas en 2022, los metemos en shena.
Ay una dicha “me vino fin al pye”. El Dyo ya save ke me plaze aktividades de shena i me manda algunas kozas en una ora ke no penso ni entre esfuenyos. En el mes de septembre me envitaron a djugar un rolo de granmama en un filmo de kurto metraje. Tomi muncho plazer, la otra semana me anunsyaron ke el filmo (SUSAM) va ser mostrado en IKSV. Veramente me gusti muncho ke tomo grado.
Despues me vino una proposisyon de una seriya de televizyon en NETFLIX. Komo el sujeto era de una famiya djudiya, la aktora prensipal (GÖKÇE BAHADIR) deviya de avlar en ladino. Me propozaron ke le de unas kuantas lisyones i ke le ambeze a avlar ladino. Aksepti kon grande plazer i empesi dos vezes a la semana siguro en zoom a traduizir el texto i ambezarle el ladino. Estas lisyones duro kaji tres mezes; kuando empesaron a travar el filmo me dyeron un chiko rolo (de figuran) i ansi empeso la aventura miya de travar filmo. Konosi un mundo muy diferente, travar filmo no asemeja a djugar teatro del todo. Por empesar, las provas i el djugo todo delantre de las kameras, luzes diferentes, mikrofones atados en las pachas. Un echo muy apenado, solo para mirar ken vyene i dizir dos palavras, un diya mos fuimos a las dyez de demanyana i tornimos a las syete del otro diya! Te fuites al plato ya estan aya las karavanes de sira, en kada uno ay una aktividad. En primero a la ambulans a mirar kayentura i test de covid. Kuando ya salyo el resultado i estas negativo te estan yevando a la karavan de kuaför, ya tyenen la foto del rolo ke tyenes, akea manera te estan peynando, kuando eskapo el kaveyo te estan yevando a la karavan de makyaj i despues a la karavan de kostumes ande ya esta pronto lo ke te vas a vistir kon nombre i alkunya. Kuando ya vino anunsyo del direktor te estan yevando al plato. En asperando te estan dando a komer lo bueno del mundo, chay i kafe an abondansya. Yo kedi kuryoza de ver komo de echo apenado ke es, las artistas no se estan okupando de nada, tu en bevyendo kafe, los kameramanes, i los ke se okupan de las luzes estan transportando sus enstrumentos byen pezgados de un lugar al otro para ordenar si es de diya u de noche veramente ke me adjideyi de verlos. Yo ke diziya ke no me plaze suivar seriyas de televizyon barminan!!! Despues de ver las penas, esto tomando la palavra atras.
Si me demandash tomates plazer? Si tomi muncho plazer; de kualo? De konoser artistos, konversar kon eyos, komer endjuntos i tener un ermozo rekuerdo. No me va konparar kon los profesyoneles ma si me demandash;
Kamera u shena??? TEATRO i yene TEATRO!
