Jean Cocteau, el intelektual Fransez: El talente es invizible en su epoka.
Ke sinyifika el arte, por un pintor, por un artisto, un senaristo, un eskrivano, ets.?
Sera la ekspresion de los sentimientos, esperansas de todo modo i forma diferente?
Dar un mesaje kon la ovra realizada, kreando un mundo ermozo, bueno i verdadero?
Entre una seansa de "nature morte” o pintando un peyzaje "d'après nature", instalados en la freskor de un pino o la solombra de un kastanyero, bushkan la definision del arte.
Mos maraviyamos de los kuadros produsidos a la manera "alla prima" komo guertelanas ke rekoltan las frutas de sus semansas.
VERMEER, el reputado pintor, fue konsiderado komo neglijavle durante tres siglos.
Sera la lingua komun de la umanita, del empesijo de la istoria asta oy:
KE ES LA MAJIYA DEL ARTE?
Pensamos tambien al filmo de STEVEN SPIELBERG. Mos apasionamos por la ijika ke, bushkando sus parientes en una shena de Schindler's List, aparese kon su manto kolorado, en un filmo blanko i preto - maraviyozo detalyo...
La satisfaksion de partajar la alegria i la inkietud de krear deborda de la paleta fekonda de pintores o eskulptores, utilizando materiales diferentes...
Diskutimos: Los artistos siempre tienen koza de dizir i sovretodo de partajar lo ke krean.
Pudimos meldar las palavras del pintor/eskulptor reputado en el Muzeo PERA, en Estambol, FERNANDO BOTERO, desde su primer ekspozision en 1957, en Washington D.C. Mos aze sonriir - Un klasisizmo yeno de spiritualita.
Mos konta por su tablo, "After Velasquez":
Fue atirado en Madrid a una ovra de Velasquez (Museo del Prado) en 1952.
Se alesha de la realita i kompoza a su manera: Una figura chika i una karura korpulante.
Lo mas impresionante fue el filmo mostrando Botero instalar sus skulpturas impozantes en las plasas las mas reputadas del mundo i los sitios komo Paris - Champs-Elysées, Tokyo, ets.
En una otra kompozision del impresionisto Fransez, MANET, “Le déjeuner sur l’herbe" puedemos ver la asemejansa transformada.
Los artistos amantes de arte sienten una felisidad i kalmo, i siertas vezes el kontrario...
Konoser el arte kon su kontenido, la armonia de las kolores i komo dar la profondidad a las ovras kon el empleo del klaro i del oskuro, se deskuvre kon la perseverensia i la voluntad, el koraje de kerer parvenir sin aretar de kreser...
Espero ke los amantes de arte deskuvriran la kapachidad fina oy eskondida...
