YUVAL NOAH HARARI

         “Yuval Noah Harari” es el istoryano el mas diskutido del siglo 21.

Mi amiga “Elda Sasson” me izo regalo este livro en mi aniversaryo. El titolo del livro me empresyono i lo meldi kon grande plazer. Kije partajar kon vozotros keridos lektores, unos kuantos penseryos de “Harari” en observando  los evenementos de su punto de vista.

       “Harari”, komo esta vyendo el Mundo Muevo?

Puede ser vamos a pueder topar repuestas por, “Las Epidemias”, “Los Lideres Invensibles”, “La Nesesidad de los Komerajes”, “La Nesesidad de una Mueva Relijyon”, “El Sistem Edukativo en lo Futuro” i otras kozas...

        “Harari” esta dizyendo ke: “El mas grande problem del mundo, de las personas, no es la epidemia, es el aboresimyento, tener ojo en todo i la inyorensya”. El anyo 2020 es un anyo ekstraordinaryo porke, la manera de bivir, de lavorar, de komer i de divertimyento troko enteramente a kavza de la pandemia.

        “Yo penso", dize el istoryano, "ke la umanidad, tyene la posibilidad teknolojika i siyantifika para venser este virus. Syen por syen vamos a kontinuar a sosyalizarmos”.     

        “Todos los enstrumentos teknolojikos, i los programes ke se estan utilizando kon estos enstrumentos, estan vyendo ande mos estamos indo en el mundo eksteryor, kon kualo mos estamos okupando, kon ken mos estamos topando, kualo estamos avlando, a kualos filmos mos estamos indo i munchos otros detalyos”... “La istorya mondyal es en realidad una kavena de katastrofas”.

        “El nasimyento de una klasa ke se ve a si mizmo inutil, sera el mas grande problem del prezente i del futuro. Una grande ola de revolusyon se esta bivyendo en el mundo”.

“Komo los lideres se estan mantenyendo en pyes en todas las kondisyones?" Puedemos dizir ke es el reynado. Las personas se espantan de dar konsejos a un sultan. Solamente le dize lo ke kere oyir. Dizir la verdad puede ser danjerozo.

Dirijir un pais es una situasyon muy difisil del punto de vista psikolojiko.

Por egzempyo, Netanyahu esta pensando ke, todo lo ke esta azyendo es por la buendad de Israel. El kere ke todos le den apoyo.

Djusto komo Erdoğan, ke esta pensando ke esta azyendo todo lo bueno por la Turkiya i Putin esta dizyendo yo so la Rusia, i se esta kreyendo a esto profondamente”.

        “Komo va ser el sistem muevo edukativo?

Kuatro siantifikos edukativos estan defendyendo ke, kale ampesar

 a ambezar kuatro sujetos muy emportantes.

-        Pensamyento kritiko,

-        Kreatividad,

-        Komunikasyon efektiva,

-        Buena kooperasyon.

Lo ke es lo mas emportante es: pueder salir abash kon la varyasyon, ambezar kozas muevas, i pueder mantener la salud mental”.

En el mundo de los anyos 2050, enventar produktos kon muevas ideas no va abastar. En primero la persona devra de rekonstruirse una vez i munchas vezes.”

        “La revolusyon de la enformasyon en komparezon kon la revolusyon endustriyal va ser muncho mas grande i lo mas probavle es ke los ke piedreron el treno nunka no lo van a pueder apanyar”.

“Deke el Medio Oryente esta dainda en este estado?

  Komo la China se izo una de las mas grandes fuersas del mundo?

  Deke la Turkiya esta luchando entre si?

  Ke es la preokupasyon de la Evropa?

  La idea de Harari es ke, la revolusyon informatika aktual no se va pueder  atrapar”. “Esta vez, los ke van a kedar atras van a ser los paizes Evropeos ke estan bastante enkyetos i dezrepozados de esta situasyon”.

“En el enterval de una pandemiya, kortar el fondo finansyero de la “Organizasyon Mondial de la Salud” no tyene dingun senso".

 “Estamos vyendo ke despues de esta epidemia, el mundo no va tornar a lo vyejo malorozamente”.