Muestro payis la Turkiya es entornada por las mares Mediteranea, Egea, Marmara i la Mar Preta. La Mar Mediteranea, mizmo si tenemos los pishkados de Balones ke vienen del Kanal de Suez i ke son venezozos es la mar la mas ancha i la ke tyene los bodres los mas leshos. La mar Egea ke se topa entre la Turkiya i la Gresia yena de islas es la mas renomada para los yates i las barkas kon velo. Para mi es la mar la mas ermoza ke egziste en el mundo. Me fui a Thailand, a Pukhet, en las kartas avia una mar maraviyoza. Kuando estavamos aya no valia nada. Mos fuimos a la Cote d’Azur i mos kedimos en el mijor otel. “El Meridien” ke apartyene a la Air France, i aya la mar no estava una maraviya. Mizmo la mar Adriatica no es tanto maraviyoza.
La mar de Marmara es una mar kon dos bosfores. El bosfor ke se topa en Estanbol entre la Mar de Marmara i la Mar Preta, ke es nomada el Bosfor i de la otra vanda el bosfor de las Dardaneles (Çanakkale) ke se topa entre la Mar de Marmara i la Mar Egea. Tenemos en Estanbol dos koryentes en la mar. En la superfisia la agua fonksyona de la Mar Preta verso la Mar de Marmara i en la ondura a la kontra. El anyo pasado kon la pandemia disheron komo las personas no estan en medio todo esta briando. Mizmo era posivle de ver los dolfines en Dolmabahçe o otros lugares. I en enverano, en las Adas, todos disheron ke la agua de la mar esta komo era kuarenta anyos antes. Limpia, limpida, klara… I dishimos “Ya vitesh lo ke es la natura?”. Este anyo malorozamente estamos bivyendo problemes muy importantes. Estamos viendo una suzyedad ensima i aryentro de la mar komo bavas. I esta trokando el lugar si el tyempo esta “poyraz” o “lodos”. Las personas de sensya empesaron a dar deklarasyones. La Mar de Marmara se esta muryendo. No devemos de komer los pishkados ke fueron apanyados en la Mar de Marmara. No devemos de komer midyas porke estan kovijadas kon estas bavas. Ke adjayip de koza. Un anyo antes una maraviya de mar. I este anyo una desgrasia. No kreo ke muevas fabrikas ke echan sus susyedades a la mar pueden ser inoguradas este anyo. Un ombre de sensya dyo una deklarasyon dizyendo ke esto afito porke la agua de la mar estava mas kaynte este anyo i todo se puede enderechar kuando la agua freska va vinir de la Mar Preta.
Devemos de resolver munchos problemes. En primero no vamos a komer pishkados de esta mar i los pishkados ke no savemos ande se engrandesyeron. Ya savesh ke estamos komyendo los levrekes, las chipuras i los somones ke fueron elevados en los chiftlikes ma en diferentes lugares! I agora vamos a komer kon grande espanto. No devemos de komer midyas i todo lo ke se giza kon las midyas.
El sigundo problem se va bivir en las kazas ke tyenen pisinas. Todos van a kerer envitar musafires a la pisina. I komo no van a emplear la mar todos van a ser en la pisina. Moro en un edifisio kon 17 famiyas. I pensash lo ke va afitar los diyas de fin de semana? Oy eskrivi al grupo de whatsapp para demandar a todos lo ke devemos de azer. Esto va ser un problem emportante.
Enveranada buena a todos.
