Keridos lektores, antes kuando una kriyatura era un poko fuerte o era muy aktivo, diziyan ke era malo o desobediente. Le davan punisyones ke no valiya para nada. Agora troko este sistem. Los paryentes los yevan a psikologes i psikiyatres para entender la razon de esta hiper aktividad. I en munchos kavzos obtienen un rezultado pozitivo ke marka la vida entera de la persona.
Lili era una ijika de syete anyos muy aktiva. No le plaziya asentar en la klasa. Kontinualamente se alevantava de su siya. No aziya atansyon a las lesones, no suivava lo ke diziya la profesora, teniya el penseryo en las nuves. Las profesoras se estavan merikiyando muncho por eya. Kuando estava buena le davan regalos i kuando estava aktiva i no lavorava le davan punisyones. Kuando tornava de la eskola a kaza, sus paryentes la kastigavan i la gritavan. Poveretika Lili no solo en la eskola ma tanbien i en su kaza teniya mala vida i estava siempre triste i maloroza.
Un diya la madre fue yamada por la direksyon de la eskola. Ya estava asperando ke le ivan a dar keshas. Ma no fue ansina. La direktrisa le disho ke esta kriyatura esta dezrepozada, parese ke tiene hiperaktividad i puedeser deve de tomar algunas kuras ke la van a kalmar.
En lo ke estavan en esta entrevista, entro aryentro un otro profesor ke ya konosiya a Lili. Les rogo a las profesoras i a la madre de Lili, de pasar a la klasa de al lado. Le disho a Lili ke aspere aki asta ke van a tornar. El profesor, avriyo la radio ke se topava en la kamareta i salyo de aya. Paso a la kamareta de al lado ke se puediya ver lo ke esta azyendo Lili ke esta sola. De la radio se estava oyendo una muzika muy ermoza. Lili se alevanto, ampeso a meneyarse i a baylar kon sus pyezes, brasos i korason. Al profesor se le izo una sonriza dulse en la kara. Disho: Vitesh, vitesh? Lili no esta hazina, Lili es una balerina. Enkomendo a la madre ke la metan a una eskola de dans.
Despues ke se fue a esta eskola, el primer diya ke torno teniya la kara yena de alegriya. Le disho a la madre: Mama, todos de aya son komo yo. Dingunas no se asentan aya.
En 1981, Lili, (Gillian Lyne) despues de una karyera komo balerina, avriyo su propriya akademiya de dansa i resivio “Rekonosimyento Internasyonal” por su arte. Despues se izo la koreografa del muzikal, “Cats”. Toda su vida fue eya una balerina muy muy famoza i baylo en munchos spaktaklos. Eya muryo a 92 anyos.
Espero ke todos los ijikos “diferentes” enkontren paryentes i adultos kapaches de entender lo ke son i no lo ke les manka. Viva las diferensyas, vivan los kodrerikos pretos i los malentendidos.
Son estos ke krean la ermozura en este mundo.
