Una istorya talmudika eskrita en Turko por muestra kerida SİLVA FİLİBA.
Keridas ermanas, vos kero kontar una istorya de vida, de munchos anyos atras en un geto de la Evropa sentral.
Geto es un lugar aryento de una sivdad i asemeja a un kazal. Kon sus kalejas estrechas, sus paredes grizas, sus kazas vyejas ke penan para kedar en pyez i un chiko pozo. En una punta una keila, en otra punta un simiteryo. Imajinavos un Geto.
Las puertas del Geto se serran oras de tadre i se korta todo kontakto kon el mundo del eksteryor. Es una vida komo una prizyon. Un punyado de personas penan a bivir sus vidas kon oskuridad, kon dolor i provedad. Savyos del talmud, rabinos, kazamenteros, ladrones todos biven endjuntos, todos se konosen i son una chika komunidad djudiya. En vezes se pelean, en vezes se abrasan ma en momentos difisiles se azen komo un solo puerpo enfrente los desastres.
LA TORA es una fuersa ke aze riyir a los ke yoran, grasyas a las tradisyones, al Shabat i a las fyestas, ke aze sovrebivir a muestros ermanos djudyos.
Agora konoseremos a Hayim el portero. Hayim korre kada diya yeno de kargo, tan kansado ke no tyene tyempo mezmo de araparse, munchas vezes la barva se le alarga fin al pecho. Sin tomar suluk, korre al pozo i toma un poko de agua para lavarse la kara, beve un poko i kontinua a su echo. Kuando gana dos groshes korre a kaza i yama a HANNA su mujer, se lo da i le dize: Toma Hanna para las kandelas de Shabat. Komo es un padre muy amorozo de sus ijos, le demanda a su mujer:
Yosef esta durmyendo en la kuna? Yankel esta kaminando? Moshele ya se fue a estudyar a la yeshiva? Havale esta lavorando ande la kuzendera?
Hayim pensa a su mujer, dize povereta Hanna ojos miyos, korona de mi kavesa pena por kuatro kriaturas, Hayim traye a kaza todo lo ganado. El se dirije semana entera para el diya de shabat.
Sigun muestra kreensya, kada shabat en tornando del kal a su kaza, el ombre djudyo tyene dos andjelos (neshama yetara) ke lo akompanyan, uno a la derecha i otro a la syedra. La alegriya del shabat, las kandelas, la meza ordenada kon komidas ermozas. Akea ora Hayim no es portero, es un rey. Lavado, peynado, vistido limpyo, se asenta a la meza i Hanna su mujer al lado es su reyna.
Las palavras del kidush “Yom ashishi” da vida a las personas kansadas. Despues de komer, los ombres se arekojen al doredor del rabino para demandar istoryas de la Tora.
“esta noche se avla de Gan-eden... Para ir al syelo kale ambezar la Tora”, dize el rabino. Un poko despues, la reunyon se eskapa i todos se van. Hayim keda el dalkavo, se aserka del rabino i le demanda:
Rabi komo me puedo ir al syelo?
En meldando la Tora, le responde el rabino
Ma yo no se meldar!
Ke echo azes?
So portero.
Alora traye agua debaldes para mis elevos, es grande mitsva.
Me puedo ir al syelo?
Siguro ke te vas!
Hayim en indose, le demanda al rabino, i Hanna mi mujer eya komo se puede ir al syelo?
Mira ijo, kuando el ombre se va a Gan-eden i su mujer se va i se asenta a los pyes de su ombre.
Hayim se va a su kaza, le dize a Hanna.
Kuando mos vamos a ir al syelo no kero ke te asentes a mis pyes, mos asentaremos endjuntos, abrasados i kon fuersa. Hanna sos mi reyna i luz de mis ojos.
