Ben Gurion i Ben Zvi en lo ke estavan estudiando en 1914 en Estambol
En los Judios tenemos una tradisyon de taparmos las kavesas. Ay diferentes opinyones de saver ken, komo, ande i kuando se va tapar la kavesa. Aki vos va meter unos kuantos stiles de kipas del mundo.
Tradisyonalmente los ombres judios se kuvryeron la kavesa durante siglos komo sinyo de respekto a la prezensya del Dio ke esta ariva. Algunas mujeres se kuvren los kaveyos kuando se kazan para tener una aparensya modesta. En vezes se meten una peruka o una esharpa o tanbien un chapeyo.
No se save egzaktamente komo ampeso este uzo de tapar las kavesas ma pensan ke viene de Aron Hakohen ke se kuvriya la kavesa kon un shal. Maimonides eskrivio ke para orasyonar kale kuvrirse la kavesa. El Shulhan Aruh dize ke los ombres deven de kuvrirsen la kavesa kuando kaminan mas de kuatro kodos (arshin=68 cm). Ma kuvrirse la kavesa, en los Ashkenazis era una kustumbre.
La kipa trikotada
La kipa es un chiko pedasiko redondo, en vezes echo kon ropa, kon saten o kon kroshe ke kuvre solo el tepe de la kavesa. Esta kipa no es para guadrarse del sol, es solo por razones relijyozas. En vezes se meten estas kipas mizmo debasho de los chapeyos. Estas kipas tienen en vezes sinyos relijyozos o nombres o figuras sembolikas ma los judios ortodokses preferan kipas pretas.
La Kipa de suet
Es komun ande los Judios mas liberales i lo mas tienen munchas kolores, se aparejan para bar mitzvas o bodas.
La kipa de kadife/velur
Estas kipas son preferidas por los judios relijiozos, haredis. Pensan ke komo la kadife es mas godra, es komo tener dos kipas, ensima la kavesa.
Kipa de Buhara
Estas kipas son brodados de kolores a kolores. Son mas grandes, kuvren la kavesa entera i tienen un bodre. Lo meten a los chikos mas muncho, porke no kaye de la kavesa. Munchos otros judios tanbien lo uzan porke les plaze.
Kipa de saten
Estas kipas mas suples, tienen astares, son espesialmente populares entre las jenerasyones mas antiguas de judíos reformistas i konservadoras.
Kipas Yemenitas
Son kipas de kadife pretas, redondas komo un domo i tienen bodres brodados.
Kipas Breslav
Estas kipas son trikotadas kon ilo blanko i en un bodre tienen un slogan de la komunidad de Breslav. Tienen un ponpon en el tepe. Los hasidikos ke no son de Breslav ke visten estas kipas ma no tienen sloganes.
Kashket
Los ijikos relijiozos visten estas kipas de fieltro (keche) komo alternativa de kipa. Parese a la forma de una kipa de Buhara.
Fes o Tarbush
Este chapeyo kolorado silindriko fue uzado tradisyonalmente por los judios del Imperio Otomano o por los de Maroko.
Streumel
Los judios haredis visten chapeyos grandes pretos. I kada sekta tiene diferensya de chapeyos. Ansina se konosen. Ma en las bodas, en las fiestas i en Shabat visten chapeyos grandes silindrikos de samara. Los visten ensima de las kipas porke dizen ke dos kuviertas para la kavesa son mas meritozas ke una.
