Resivir i dar regalos aze orozo a la persona. En kada okazyon mos plaze resivir regalos. En fiestas, en diyas emportantes, komo data de kazamiento, data de nasimyento i otras. Tanbien dar regalos da una satisfaksyon morala a la persona. Kuando se da un regalo, se ve en la kara del ken lo aresive una sonriza, una alegriya. I esto tanbien alegra al ken da.
Dar regalo es un echo muy delikado i difisil.
Un diya un ombre le ofryo un buketo muy grande de rozas a su mujer. La mujer al lugar ke este kontente de este buketo kolosal, ampeso a gritarlo i le disho: Ken save la kulpa ke izites i me trushites este buketo tanto grande, para tapar tus faltas.
Komo meldatesh, kale dar regalos kon karar. Ni muncho, ni poko. A ken kale dar regalos i deke? Esta kestion mos pensamos anyo entero. Kuando miramos las vitrinas, vemos una kozika ke mos aze akodrar a ken lo puedemos dar por su aniversario.
Me plaze ofreser regalos. Penso ke es un evenimiento para eksprimar mi apresyasyon para las personas ke estan en mi vida. Kuando va azer un regalo penso muncho, para endivinar kualo le puede plazer a esta persona. Me asiguro ke es una koza ke me plaze muncho i penso, ke un regalo ke me plaze i a mi tanbien, va enforteser muestra amistad.
Mas ke resivir un regalo es, igualmente emportante de avrir un ermozo paketo. Por esto en eskojendo el regalo kale eskojer i el ambalaje, el papel i la kordela ke lo va emburujar. Resivir un ermozo paketo aze plazer a la persona. Tomar i tokar el paketo, avrir la kordela o el fiyongo de ensima, arazgar el papel, asta kitar el regalo en medyo es agradable.
El presyo no es muy emportante. Komo dizimos: Al rey un yeshil yaprak. O otra dicha: El ken da muncho, lo da de su rikeza, el ken da poko lo da de su alma. Lo emportante es de pensar en la persona.
Tanbien el regalo ke se ofrese amostra la jenerozidad de la persona.
Yo konosko una persona muy rika, ma la mano apretada. Kuando se iva ande los sovrinos, les dava un gofret para dos ijikos.
Teniyamos un profesor en la eskola, mos diziya: Si keresh azer un regalo ke pase mahpul, vash a merkar un regalo karo, ma ke no sierve para nada.
En kurto, dar regalos es un arte.
