En Italia se topo misteriozamente la "Tabula Cortonensis" (la tableta de Cortona).
La deskuvierta ke tuvo lugar en Toskana se rendió publiko antes 15 o 20 anyos.
Por ke razon este silensio por la tableta Etruska de bronzo, datada del siglo III o II, antes de Kristo?
Este pedaso puedria revelarse kapital por la konosensia de la lingua Etruska. Una lingua ke no asemeja a dinguna otra lingua, ke se save meldar perfektamente, por la razon ke los Etruskos utilizavan el alfabeto Grego...
Ma el mas largo teksto Etrusko ke se eskrivio ensima de este metal (40 linyas), fue deshifrado en muestra epoka.
Mas interesante - no mos prezenta un teksto funerario, komo las inskripsiones presedentes, ma es un kontrato establesido entre dos famiyas importantes.
Esta bushkidad empesa kuando en 1992 un karpintero se prezenta delantre de los karabinieres kon este objekto presiozo. Eksplikó ke lo topó entre las fondasiones en Cortona ande lavorava.
La version no konvino, ni se konvensió el Prof. Francesco Nicosia, arkeologo del Ministerio de los Bienes Kulturales.
Despues de eskavar el terreno, el profesor desida ke este pedaso no viene de akel lugar...
Una otra enigma ke mos aze saver el spesialisto:
"No savemos la razon por ke la tableta fue metida en 8 pedasos, ke el ultimo no fue topado, komo lo presizó el fragmento.
Se pensa tambien ke puede ser fue espedasado volontariamente...
Este lavoro para deshifrar la TABULA CORTONENSIS no va ser muy kurto.
Penso ke vos plazerá saver mas...
Va kontinuar la semana ke viene.
Keridos lektores, vos sueto semanada buena i klara.
