Aldo Sevi
La Tant Roza, prima ermana de mi madre, i su marido, Pepo, alkilavan por el enverano, una kamareta en la izla de Halki (en turko, Heybeli). Era una kamareta grande en un apartamento viejo ke apartenía a una mujer ermenía ke morava en una de las kamaretas i las otras las alkilavan a djente ke vinían a la izla por el enverano.
La kamareta era, esensialmente, una grande kamareta de echar. La koza la mas dominante ayá era un garderop impresionante kon puertas un poko redondeadas ke davan al fronte una forma ondoza. En el sentro de la kamareta avía una kama doble, i al lado de las paredes avían otrunas dos kamas singulares. Roza i Pepo, sus ija Fifi i sus ijo Israel moravan en esta kamareta kada anyo, el enverano entero. Tenían ayá lavabó i gaz, ama orno no tenían. Las borekas ke la tant Roza aparejava las embiyava a un orno en la kaye.
Una noche mos kedimos mi madre, mi ermana i yo, kon eyos. Siete personas kavimos en tres kamas… Akeya noche la tant Roza mos kontó munchos kuentos, ama solo uno me kedó en el tino: para ke Fifi no se kede klasa i pueda eskapar la eskola, devían dar un “regalo” a la maestra. Le demandaron si tenía menester de alguna koza, i la maestra les respondió ke le mankava un kolchón… Ansina al presio de un kolchón, asiguraron la diploma de la eskola primaria de Fifi…
Para mi, el avantaje mas grande de esta kamareta era una ventana grande ke mirava a un sinemá avierta. Me akodro otruna noche en esta kamareta, tres anyos después. Los grandes djugavan kartas, i yo vía por la ventana un filmo del grupo Abba, ke tenía muncha fama en los anyos setenta. No se komo, ensupito me kortí la mano en una manera serioza. Mi madre se espantó un poko kuando no toparon bandaje i pomada antiséptika… La tant Roza detuvó la sangre ke estava koriendo de mi mano kon tutún ke kitó de dos-tres sigaros… Aínda tengo una marka chikitika en mi mano derecha al lado del dedo del aniyo.
La última vez ke la vide a la tant Roza fue en 1995. Era bivda i morava en Yakadjik, en un apartamento ke apartenía a su tío Aron. Ya estava un poko dezorientada. No supo darme su adreso o direksiones komo ir de la estasión de otobús a su kaza. Me disho: "Ven a Yakadjik i demanda por mi. Todos me konosen. So la sola djudía akí." Ansina ize, i muy presto topí un bakkal ke la konosía, i el bakkal mandó su chirak para ke me amostre el kamino. Pasí kon eya una djornada muy agradavle. Mos fuimos a komer lahmadjún en un restorante a la punta de la montanya, al lado de una fuente ke se yama Şeker Suyu (agua de asúkar) - un lugar ke konosía de mi chikez en Estambol.
La Tant Roza era una mujer muy simpátika i siempre me akodro de eya kon karinyo grande.
