Süzet Herman
Vos va kontar un pasaje del famozo eskritoryo Nazım Hikmet Ran.
Un mansevo ke se iva ir a la armada entro en una biblioteka i tomo un livro para meldar durante su viyaje. Kuando vino a kaza avyo el livro i vido ke munchas frazes estavan trasadas i veramente estas frazas le estavan enteresado, i para el eran unas frazas ke ekplikavan sus ideas i sentimientos.
Tomo el livro, se hue a la biblioteka i demando:
Me puedesh dar el nombre de la persona ke meldo este livro antes de mi?
I le diyeron un nombre de una mujer i el adreso.
El ombre eskrivyo una letra a esta mujer, i le disho:
Yo me esto indo a la armada ma keriya kontaktarvos por letra.
La mujer le respondiyo: kon plazer. Esta mujer se yamava Lara.
I empesaron a eskrivirsen. Las letras fueron i vinieron durante 2 anyos.
Vino el tiyempo de tornar de la armada i el mansevo le eskrivyo a la mujer de mandarle una foto.
La mujer le disho, foto no te va embiyar, ma va vinir a aresivirte del treno. Yo me va meter una trandafila en la yaka, i tu me vas a konoser de esta roza kolorada.
El treno yego. El mansevo abasho del treno, yeno de emosyon, bushkando la mujer kon la trandafila.
Una mujer blonda kon ojos blu, alta i flaka, ermoza komo el sol se aserko de el i le disho: Keres vinir kon mi?
En este punto, el mansevo vido la mujer kon la trandafila. Esta mujer estava bashitika, godra, kon kaveyos ruvyos, mal vistida...
El mansevo sin ezitar, en koryendo, desho la ermoza mujer ke lo areto, i vino allado de la mujer bien feya ke teniya la trandafila. I le disho: Bonjour Lara.
La mujer le disho, yo no me yamo Lara.
El muchacho le disho: Ma tu tienes en la yaka una trandafila.
La mujer le disho: un poko antes una ermoza mujer blonda me la apunto, i me disho, esto va ser el egzamen de mi vida, i me disho ke se esta indo al kafe de enfrente de la gar!
