El mez pasado de Junio tuvimos un tiempo fresko i luvyozo ke mos izo pensar ke este anyo no va vinir el enverano. Ma verso la fin del mez, ampesaron las kalores i enkorajo a la djente de ir a las kampanyas. En el empesijo de Julio los tiempos ya se ampesaron a kayentar, las kalores turaron unos kuantos diyas i esto no kontinuo muncho. A partir de la semana pasada tuvimos luvyas kon turguelos i relampagos fuertes barbinam. Estos turguelos i relampagos trusheron luvyas komo ke si fuera vazyar kuvos de los sielos. En munchos lugares izo seles. Las kazas i los magazenes se incheron de aguas. Povereto de un perro ke estava atado en una guerta delantre de una kaza no se pudo fuyir i se aogo. Es klaro ke el mundo entero esta biviendo un trokamiento klimatiko.
Avlando de kampanyas en Estambol, la djente ke fin agora se ivan a las islas (Adas), Yeshilkoy u bien a la parte Asiatika ke son Caddebostan, Göztepe, ampesaron a irsen a Bodrum, Çeşme, Fethiye. Aya la mar esta limpya djaspe. Ma en Estambol malorozamente no vamos a tener la posibilidad de entrar a la mar, por modo de estas bavas de mar ke las yaman müsilaj. Dizen ke alimpyar la mar de Marmara va sureyar a lo manko tres anyos. Dizen tanbien ke estas bavas pueden trayer la Kolera. Esto solo mos mankava.
A partir del primo de Julio una parte de las prekosyones tomadas kontra la korona se alevantaron. Asigun la desizyon de la normalizasyon ya es verdad ke las personas mas no pueden suportar de estar aprezadas en kaza sin ver a dingunos.
A muncha djente le esta paresyendo ke la pandemiya ya se eskapo i salen sin maskas. En los kafes i restoranes unos enriva de otros. Esta de verdad de espantar sovre todo kon esta mutasyon mueva ke se esta espandyendo mas presto. El Dio ke mos guadre. Por esto kale ke no mankemos de vaksinarmos. No ay otro remedyo. Estamos afritos de estar kon la famiya i kon los amigos.
Antes de eskapar vos kero kontar las difikultades de transportos en Buyukada. Los otobuses i los chikos taksis ke metyeron no estan abastando. Kale ke pujen la kantidad de estos vehikulos i tanbien ke agan dos rangos de asperar, la una para los turistos i la otra para los moradores de la Isla, komo teniyamos en el tiempo de los faytones.
